Silja Björk biður Ingó af­sökunar

Silja, sem er titlaður sérfræðingur í samfélagsmiðlum á auglýsingastofunni Pipar, birtir afsökunarbeiðni sína meðal annars á Facebook-síðu sinni, en setur engu að síður þar þann fyrirvara að fjölmiðlar megi ekki vitna í afsökunarbeiðni hennar. 

Afsökunarbeiðni Silju Bjarkar

Afsökunarbeiðnin er eftirfarandi:

Afsökunarbeiðnin hluti af dómsátt

Tónlistarmaðurinn Ingólfur Þórarinsson, sem hefur staðið í orrahríð ásakana um sitthvað misjafnt, birtir einnig afsökunarbeiðnina á sinni síðu og segir sig hafa nú í tæp fjögur ár staðið í að verja æru sína og lífsviðurværi gagnvart ásökunum af þessu tagi. Honum sé mikilvægt að fá fram þessa afsökunarbeiðni.

„Eins og með hitt málið sem ég vann hef ég verið að reyna að verja mig fyrir verstu ummælunum á netinu sem féllu fyrir fjórum árum. Þá var þessi kona ein þeirra sem sagði mjög ljóta hluti. Þegar hún fékk stefnu fyrir meiðyrði þá var gerð dómsátt,“ segir Ingólfur í samtali við Vísi.

Kannski er þetta einhver allt annar Ingó?

Ingólfur vann mál gegn Sindra Þór Sigríðarsyni sem var af svipuðum meiði og var honum gert að greiða Ingólfi skaðabætur. Sindri var sýknaður í héraði en dæmdur fyrir ærumeiðingra í Landsrétti. Meðan ásakanirnar gegn Ingólfi gengu sem hæst steig Haraldur Þorleifsson athafnamaður fram og sagðist vilja greiða alla þá reikninga sem fólk stæði frammi fyrir í dómsmálum gegn Ingólfi. 

Það var við það tækifæri sem ummæli Silju féllu, sem athugasemd á reikning Haraldar:

„Erum við ekki öll sammála um að við erum ekki að fara að moka pening í barnaníðing og nauðgara.“

Erfitt gæti reynst að fá það til að koma heim og saman að þarna hafi ekki verið átt við Ingólf sem segir:

„Já, það væri nú kómískt ef þarna hafi verið átt við einhvern allt annan mann en mig.“

Samtökin Öfgar hafa látið sig málið varða og skrifuðu grein sem þau fengu birta á Vísi á þriðjudaginn þar sem þau tala um að kona hafi verið neydd til að birta afsökunarbeiðni. Ljóst er nú hvað var við átt í þeim skrifum.

Greinina má sjá að neðan.

Minnir á mikilvægi tjáningarfrelsis

Silja segir í færslu á Facebook tjáningafrelsi einstaklinga mikilvægt og lýðræðið sömuleiðis. 

„Á síðustu árum hefur meiðyrðamálum fjölgað svo um munar, í ljósi femínískra byltinga á samfélagsmiðlum og víðar. Ég tek virkan þátt í slíkum byltingum og nýti ætíð minn rétt til tjáningarfrelsis óspart, enda vinn ég við það að tjá mig. Réttlætiskenndin mín er sterk og þörfin fyrir að verja þolendur með kjafti og klóm enn sterkari. Það hefur ekkert breyst þó áherslur mínar hafi kannski gert það í ljósi afleiðinga einna ummæla sem ég viðhafði,“ segir Silja Björk.

Hún vísar til málaferlanna vegna ummælanna sem staðið hafi í þrjú ár.

„Ég hafði, og hef enn ekki, áhuga á fjölmiðlaumfjöllun um þetta mál og bjóða fjölskyldu minni og vinum upp á það að horfa á bláókunnugt fólk úthýsa mér, hóta mér og kalla mig öllum illum nöfnum í kommentakerfum landsins. Ég hafði, og hef ekki, áhuga á því að fá athygli út á gamalt tvít, sem var sett fram í mikilli reiði í stormi þúsunda annarra tvíta og ég er löngu búin að eyða. Ég hef í rauninni engan áhuga á því að segja neitt frekar um þetta mál annað en það að nú er loksins komið að því að sátt hefur náðst.“ 

Liður í þeirri sátt séu greiðslur miskabóta og fyrrnefnd yfirlýsing.

Þakklát að geta lokað málinu

„Það verða eflaust einhver sem efast um þá ákvörðun mína að semja um málið utan réttar og spyrja sig hvers vegna baráttukona eins og ég fór ekki með þetta alla leið. Sorglegur sannleikurinn er hins vegar sá að hefði ég farið með málið áfram í dómstóla, hefði það haft í för með sér gríðarlega mikið fjárhagslegt og tilfinningalegt tjón fyrir mig og fjölskyldu mína, sama hvernig dæmt hefði verið í málinu. Það sáum við morgunljóst í máli Sindra Þórs sem vann í héraðdsómi en var málinu svo áfrýjað og að endingu snúið við í Landsrétti stefnanda í vil. Þessi mál eru mjög matskennd og mismunandi eftir dómurum og tíðaranda hverju sinni og það var ekki áhætta sem ég hafði áhuga á að taka. Aukinheldur hefðu mín málaferli tekið tvö til þrjú ár til viðbótar við þau þrjú ár sem ég hef nú þegar staðið í þessum ferlum.“ 

Hún áréttar að ummælin hafi ekki snúist um neinn einn ákveðin aðila, heldur átt að varpa ljósi á stöðu þolenda og þeirra sem þora að segja frá í íslensku réttarkerfi, þar sem hægt sé að senda kröfur og kærur fyrir allskonar ummæli.

„Í dag er ég þakklát að loka þessu máli og geta notað orkuna sem hefur farið í þetta síðustu þrjú árin, í eitthvað annað og betra - eins og að skipuleggja ráðstefnu um hugvíkkandi byltingu í geðlyfjalækningum og láta gott af mér leiða í samfélaginu, eins og hefur verið ásetningur minn síðasta áratug.“