FH tók forystuna á fyrstu mínútu með marki beint úr aukaspyrnu sem Kjartan Kári þrumaði í nærhornið úr stöðu sem var alls ekki vænleg. Flestir bjuggust við fyrirgjöf en Kjartan sá opnun og skaut að marki.
„Ég held að ég sé að setja of mikið traust á manninn sem ég set í vegginn til að loka nærhorninu, en auðvitað á ég líka að geta bjargað þessu, það er ekki það.“
Þetta er í annað sinn í sumar sem Kjartan Kári skorar beint úr aukaspyrnu á Árna. Þeir voru ekki vinir fyrir og verða það líklega ekki í bráð.
„Neinei, ég hef ekkert á móti honum,“ svaraði Árni, brosti við og setti ábyrgðina á sjálfan sig.
„Ég verð bara að setja fleiri í vegginn næst og standa í nærhorninu eða eitthvað.“
Það eru tveir leikir eftir af tímabilinu og ÍA hefur blandað sér í baráttuna um þriðja sætið eftirsótta. Árni ætlar að passa nærhornið vel og vonar að liðið sæki stigin sem það þarf.
„Við förum bara fulla ferð á það, höfum engu að tapa. Eigum heimaleik aftur næst [gegn Víkingi] og stefnum bara á að sækja þrjú stig þar. Sjáum hvað það dugir okkur,“ sagði Árni að lokum.
