Dregur úr vindi og úr­komu með morgninum

Á vef Veðurstofunnar segir að það verði suðvestankaldi eða strekkingur síðdegis og skúrir eða slydduél, en þurrt að kalla á Norðausturlandi. Hiti verðurvíða á bilinu fimm til tíu stig.

Gular viðvaranir eru enn víða í gildi vegna asahláku.

Í nótt hefur verið talsverð eða mikil rigning sunnan og vestanlands og asahláka með vatnavöxtum. Nokkur aurflóð féllu á Vestfjörðum í gærkvöldi, en fyrst rann lítið flóð úr Eyrarhlíð yfir Hnífsdalsveg. Vegurinn var fljótt hreinsaður og opnaður. Síðar um kvöldið rann síðan annað flóð í Bjarnardal í Önundarfirði og lokaði veglinum um Gemlufallsheiði.

Vegir á svæðinu eru færir samkvæmt upplýsingasíðu Vegagerðarinnar, en ökumenn eru beðnir um að fara með gát enda gæti verið grjót á veginum. Á Suðurlandi flæddi svo vatn yfir veginn beggja vegna við brúnna yfir Bakkakotsá og þar er umferðarstýring á svæðinu að sögn Vegagerðar.

„Í kvöld bætir heldur í vind á norðaustanverðu landinu, hvassviðri eða stormur þar og snarpar vindhviður við fjöll. Kólnar í veðri.

Hægari suðvestlæg átt á morgun. Skýjað með köflum og stöku él vestanlands, hiti um eða yfir frostmarki. Léttskýjað fyrir austan og frost 0 til 5 stig,“ segir á vef Veðurstofunnar.

Veðurhorfur á landinu næstu daga

Á þriðjudag: Suðvestan 8-15 m/s, en lægir síðdegis. Víða bjart veður, en él á stöku stað. Hiti í kringum frostmark.

Á miðvikudag: Suðaustan 13-20 og talsverð rigning eða slydda, en úrkomuminna á Norðausturlandi. Hlýnar í veðri, hiti 2 til 9 stig síðdegis.

Á fimmtudag: Sunnan og suðvestan 8-15 og slydduél, en bjartviðri norðaustantil. Hiti 0 til 5 stig. Snýst í norðanátt með snjókomu norðvestanlands um kvöldið og kólnar.

Á föstudag: Norðvestan 10-18 og él fyrir norðan, en bjart með köflum sunnan heiða. Frost 0 til 6 stig.

Á laugardag: Gengur í hvassa sunnanátt með slyddu eða rigningu, en suðvestlægari og él um kvöldið. Hlýnar um tíma.

Á sunnudag: Útlit fyrir suðvestlæga átt með éljum, en bjartviðri norðaustanlands. Kólnar í veðri.