„Það sem við erum að gera er að senda erindi á veitingahús. Miðla upplýsingum til félagsfólks og annarra um að láta ekki gabba sig til að ganga í þetta svo kallaða stéttarfélag Virðingu. Jafnframt erum við að skoða fjölmargar aðrar leiðir til að stoppa þessa aðför að réttindum vinnandi fólks sem þarna hefur verið hrint í framkvæmd,“ segir Sólveig Anna.
Fimmtungur hafi sagt sig úr SVEIT
Efling tilkynnti í gær um fjölmargar aðgerðir gegn fyrirtækjum innan SVEIT. Þá kom fram í dag að fimmtungur fyrirtækjanna hefði sagt sig úr samtökunum eftir að tilkynning Eflingar um aðgerðir. SVEIT tilkynnti svo síðdegis að samtökin ætluðu að endurskoða kjarasamning sinn við Virðingu eftir harða gagnrýni. Samtökin vonuðust til að Efling léti af aðgerðum sínum á meðan.
Efling hefur harðlega gagnrýnt kjarasamning SVEIT og Virðingar. Virðing væri gervistéttarfélag og svikamylla og kjörin lakari en hj´a öðrum stéttarfélögum. Gengið væri á kjör launafólks í samningnum. Auk þess væri gengið gegn grundvallarreglum á vinnumarkað um að atvinnurekendur stofni ekki sjálfir stéttarfélög og krefji starfsmenn sína til að ganga í þau. BSRB, BHM, Samiðn og fleiri félög hafa tekið undir gagnrýni Eflingar.
Í tilkynningu SVEIT í dag kemur fram að samtökin hafi reynt að semja við Eflingu en Efling hafi hafnað því. Sólveig Anna segir þetta ekki rétt. Efling hafi viljað semja við SVEIT en myndi aldrei gera samning sem væri með lakari kjörum en þeir samningar sem þegar hefðu verið gerðir. Þar hafi samningaviðræðunum lokið.
Hafna því að lögbrot hafi átt sér stað
Stjórn Virðingar stéttarfélags hafnar því alfarið í yfirlýsingu að félagið sé að fremja lögbrot. Félagsmenn Virðingar eigi rétt á að stofna eigið stéttarfélag og gera þá samninga sem þeir væru tilbúnir að vinna eftir.
„Virðing stéttarfélag er stofnað af starfsmönnum í veitingahúsum. Sá kjarasamningur sem félagið gerði við Samtök fyrirtækja á veitingamarkaði lítur að störfum í veitingahúsum. Hann tekur mið af þeim vinnutíma og því starfsumhverfi sem þar ríkir. Kjarasamningur Eflingar er um kjör verkamanna, bifreiðastjóra, ræstingarfólks, ófaglærðs fólks á dagheimilum, iðnverkafólks, starfsfólks í kjötvinnslum, dekkjaverkstæðum, járn- og vélaverkstæðum og svo mætti lengi telja. Þannig er hann ekki sniðin að því starfsumhverfi sem ríkir á veitingastöðum,“ segir í yfirlýsingu Virðingar.
Efling hafi ekki einkarétt á að semja
Það ekki koma formanni eða stjórn Eflingar ekki við að starfsfólk hafi viljað stofna sitt eigið stéttarfélag og vilji ekki vera í Eflingu. Efling hafi ekki einkarétt á að semja fyrir þeirra hönd.
„Sá kjarasamningur sem Virðing og veitingamenn hafa nú undirritað er gerður af fúsum og frjálsum vilja undir formerkjum félagafrelsis sem varið er af íslensku stjórnarskránni. Í sumum atriðum veitir hann betri kjör en kjarasamningur Eflingar í öðrum lakari,“ segir í tilkynningunni.
Þegar stofnaður verði sjúkrasjóður í nafni Virðingar muni eitt prósent aukaframlag sem vinnuveitendur greiði nú til Virðingar renna í þann sjóð. Þangað til verði framlagið nýtt til að koma styrkum stoðum undir félagið.
Muni laga misfellur í samningi
„Aðrar misfellur sem bent hefur verið á verða lagfærðar eins og röng tilvitnun í fæðingarorlofslög. Þá er samkomulag milli Virðingar og vinnuveitenda þess efnis að lagfæra nokkur atriði sem betur mega fara,“ segir í yfirlýsingunni. Stjórn Virðingar frábiðji að vera bendluð við lögbrot. Félagsmenn Virðingar hafi og eigi rétt á að stofna sitt eigið stéttarfélag og gera þá samninga sem þeir væru tilbúnir að vinna eftir.
Yfirlýsingin er ekki undirrituð en á heimasíðu félagsins kemur fram að formaður félagsins sé Jafet Thor Arnfjörð Sigurðarson og meðstjórnendur Jóhann Stefánsson og Jóhanna Sigurbjörg Húnfjörð. Valdimar Leó Friðriksson hafi verið ráðinn framkvæmdastjóri en að hann taki ekki til starfa fyrr en í janúar á næsta ári.
