Telur að psilocybin og MDMA fái markaðs­leyfi á næstu árum

Ráðstefna um notkun hugvíkkandi efna í lækningaskyni fór fram í Hörpu í síðustu viku. Þar voru fjörutíu fyrirlesarar staddir, alls staðar að úr heiminum, til að miðla þekkingu sinni.

„Þesssi efni eru ólögleg þannig að það er rosalega mikil mótstaða og mikið af fordómum líka. Skiljanlega er fólk hrætt en þess vegna erum við að halda þessa ráðstefnu svo fólk geti komið og hlustað og skilið hvers vegna er verið að nota þessi efni,“ segir Sara María Júlíusdóttir, einn skipuleggjenda Psychadelics as Medicine. 

„Þetta mest spennandi meðferðin og hún lofar mjög góðu“

David Erritzoe er danskur geðlæknir og taugavísindamaður og er forstöðumaður miðstöðvar um hugvíkkandi efni við Imperial College í Lundúnum. Hann hefur undanfarna tvo áratugi rannsakað notkun hugvíkkandi efna við geðsjúkdómum.

„Við höfum rannsakað psilocybin-meðferð við þunglyndi en einnig nýlega prófað notkun við áráttu- og þráhyggjuröskun og krónískum verkjum. Nú erum við að setja af stað tilraunir á notkun við ópíóíðafíkn og spilafíkn,“ segir David. 

Hann segir að rannsóknir á Psilocybin, sem er virka efnið í sveppum, og MDMA séu lengst komnar og ketamín hefur þegar fengið markaðsleyfi sem meðferð við þunglyndi. Hann telur líklegt að á næstu árum fái Psylosibin og MDMA markaðsleyfi.

Psilocybin hefur verið rannsakað sem meðferðarúrræði við ýmiskonar kvillum eins og fram kemur í máli Erritzoe hér að framan en MDMA hefur verið rannsakað í meðferð við áfallastreyturöskun.

„Það er mikil þörf. Margir sjúklingar fá ófullnægjandi þjónustu og það eru ekki nægilega mörg góð meðferðarúrræði svo það er stór meðferðareyða. Í geðlækningum þessa stundina er þetta mest spennandi meðferðin og hún lofar mjög góðu.“

„Þessi efni eru bara geðhjálp og ekkert annað“

Hann segist hafa fullan skilning á að heilbrigðisstarfsmenn séu skeptískir og þeir eigi að vera það.

„En það er ótrúlega mikilvægt að vera vakandi fyrir vísbendingunum og vera forvitinn og með opinn huga.“

Á morgun, þriðjudag, eiga forsvarsmenn ráðstefnunnar fund með Heilbrigðisráðuneytinu þar sem þeir munu kynna þær upplýsingar sem fram koma á ráðstefnunni.

„Þessi efni komast dýpra en venjuleg samtalsmeðferð. Þessi efni hafa sameiginlega þann hæfileika að hjálpa manni að komast inn á við og komast að kjarna sársins síns, sem er oft rótin á því sem er að plaga mann,“ segir Sara María. 

„Við ætlum að reyna að kynna fyrir þeim það sem fyrirlesararnir eru að miðla til okkar. Við mætum alltaf því sama: „Við viljum ekki mæta, við viljum ekki hlusta, það vantar fleiri rannsóknir.“ En það er búið að gera mörg hundruð klínískra rannsókna út um allan heim. Það er fullt af rannsóknum þannig að það er kominn tími til að hlusta og skoða þetta.“

„Þessi efni eru bara geðhjálp og ekkert annað.“