Á sunnudaginn sagði Carragher að það ynni gegn Mohamed Salah, leikmanni Liverpool, í baráttunni um einstaklingsverðlaun á borð við Gullboltann að hann keppti í Afríkukeppninni. Að mati Carraghers er hún ekki jafn stórt mót eins og EM, HM eða Suður-Ameríkukeppnin.
Ýmis stór nöfn í fótboltaheiminum, menn á borð við Daniel Sturridge og Rio Ferdinand, hafa gagnrýnt Carragher fyrir ummæli hans um Afríkukeppnina. Nú hefur Mikel bæst í þann hóp og hann dró ekkert undan í hlaðvarpi sínu, The Obi One Podcast.
„Það sem hann sagði var lítillækkandi og þetta kom frá einhverjum sem hefur aldrei unnið stórmót með enska landsliðinu,“ sagði Mikel.
„Fullyrðing hans var röng. Ég vona að hann sjái að sér og biðjist afsökunar því hann skuldar fólki afsökunarbeiðni. Það var svo fávíst að vanvirða svona stórkostlega keppni. Ef þú heldur að enska úrvalsdeildin væri það sem hún er í dag með einungis enskum leikmönnum ertu að grínast.“
Mikel gaf svo enn frekar í og lét Carragher heyra það.
„Glottið á smettinu á honum, þetta hrokafulla glott. Fólk er að reyna að leiðrétta þig en þú kemur fram og ræðst á bókstaflega alla og lítillækkar þessa frábæru keppni,“ sagði Mikel.
„Maðurinn sem segir svo margt í sjónvarpinu hefur aldrei unnið ensku úrvalsdeildina, greinir lið og segir þeim að þú verðir að vinna deildina. Þú hefur aldrei unnið þetta, þú veist ekki hvað þarf til að vinna deildina eða stórmót. Þú getur ekki lítillækkað svona stórkostlega keppni. Fólk í Afríku deyr fyrir Afríkukeppnina. Ég er algjörlega brjálaður, algjörlega brjálaður.“
Mikel vann ensku úrvalsdeildina með Chelsea 2010 og 2015 og Afríkukeppnina með Nígeríu 2013. Þá vann hann brons á Ólympíuleikunum 2016.
