Tölur Alþjóðaheilbrigðismálastofnunarinnar sýna að ein af hverjum þremur konum upplifir ofbeldi í nánu sambandi einhvern tímann á ævinni. Ein birtingarmynd ofbeldisins er fjárhagslegt ofbeldi.

„Fjárhagslegt ofbeldi, sá þáttur er að hækka í tegundum ofbeldis í nánum samböndum. Hvort sem það er vegna þess að konur eru meðvitaðri um að það er ofbeldi. Það er erfitt að segja til um það. Við erum að sjá sífellt nýjar leiðir sem farnar eru til þess að beita fjárhagslegu ofbeldi. Annað hvort með því að halda þolendum frá sameiginlegum fjármunum, að þær skrifi undir alls konar plögg þannig að þær standi uppi slippar og snauðar eftir ofbeldissamband og margt þvíumlíkt,“ segir Linda Dröfn Gunnarsdóttir, framkvæmdastýra Kvennaathvarfsins.

Kvennaathvarfið hefur undanfarið veitt tryggingarfélaginu Verði ráðgjöf við þróun á nýrri tryggingarvernd á Íslandi fyrir þolendur ofbeldis í nánum samböndum sem felur í sér að fólk í þessari stöðu geti fengið bætur. Fyrirmyndin kemur frá erlendum tryggingafélögum. Ólíkt því sem er þar þarf ekki lögregluskýrslu til að fá bæturnar hér heldur dugar staðfesting frá fagaðila.

Mikilvægt að fá fyrirtækin með

„Í öllum samtölum sem við höfum verið að eiga þá sjáum við að fjárhagslegi hlutinn er oft flókinn og það að geta þá sótt stuðning þegar þetta er að gerast þá vonum við að þetta geti þá hjálpað fólki að breyta aðstæðum sínum frekar.“

Linda segir þetta hafa mikla þýðingu og þá sé mikilvægt að fá fyrirtækin með í baráttuna.

„Þetta er barátta okkar allra og þetta vinnst aldrei nema við gerum þetta saman og á öllum stigum þjóðfélagsins og fyrirtækin eru þar mikilvæg. Það eru aðilar innan allra fyrirtækja sem hafa orðið fyrir ofbeldi í nánu sambandi og það er mikilvægt að þau að finna að þau hafa þennan stuðning.“

Hluti af öllum heimilistryggingum

Verndin er nú hluti af öllum heimilistryggingum Varðar, gildir fyrir öll kyn og kemur án viðbótarkostnaðar.

„Það er sorgleg staðreynd að heimilið sé einn hættulegasti staðurinn fyrir konur. Við sem samfélag, við getum breytt þessu. Það er okkar hlutverk að vera til staðar fyrir fólk þegar áföll dynja á. Við hjá Verði ákváðum að bæta við Heimilisverndina okkar, þannig að öll sem verða fyrir ofbeldi í nánu sambandi eru tryggð og geta nú með einföldum hætti sótt í trygginguna og fengið fjárhagslegar bætur, og þannig frekar breytt aðstæðum sínum,“ segir Guðbjörg Heiða Guðmundsdóttir, forstjóri Varðar Trygginga, í tilkynningu um þessa nýju vernd.

Til að tryggingin nái til sem flestra ákváðum við að bæta henni við hefðbundna heimilistryggingu sem lang flest heimili eru nú þegar með og hefur hingað til tryggt fólk fyrir slysum og veraldlegum eigum.

„Það hefur verið mikill styrkur að fá faglega ráðgjöf Kvennaathvarfsins við að móta verndina og ferlið í kringum hana. Með því að hefja vegferðina með þeim erum við að byrja þar sem þörfin er mest. Auk þess erum við erum búin að vinna mikla undirbúningsvinnu og eiga samtöl við aðra fagaðila. Við sjáum fyrir okkur að í vegferðinni framundan þá þróist verndin og aðrir fagaðilar komi að ferlinu. Ofbeldi í nánum samböndum er víðtækt og það er ekki í lagi. Þetta varðar okkur öll,“ segir Guðbjörg Heiða.