Innlent

Ævin­týri um allan heim biðu ungra ís­lenskra flug­manna

Kristján Már Unnarsson skrifar
Íslensk áhöfn Cargolux-flugvélar á flugvellinum í Singapore árið 1976. Frá vinstri: Friðrik Guðjónsson, Ómar Steindórsson, Jóhannes Kristinsson og Eyjólfur Hauksson.
Íslensk áhöfn Cargolux-flugvélar á flugvellinum í Singapore árið 1976. Frá vinstri: Friðrik Guðjónsson, Ómar Steindórsson, Jóhannes Kristinsson og Eyjólfur Hauksson. Cargolux

Ungir íslenskir flugmenn sem misstu vinnuna hjá Loftleiðum upp úr 1970 færðu sig flestir yfir til hins nýstofnaða félags Cargolux. Þar biðu þeirra meiri ævintýri en þeir höfðu áður kynnst en einnig miklar áskoranir.

Í þættinum Flugþjóðin á Stöð 2 fræðumst við um sögu landnáms íslenska flugfólksins í Lúxemborg. Eiginmennirnir flugu um allan heim og voru oft langdvölum að heiman. Hlutskipti eiginkvennanna varð að halda utan um heimilið og börnin í ókunnu landi.

Björn Sverrisson og Salvör Þormóðsdóttir á heimili sínu í Móseldalnum í Lúxemborg. Þau störfuðu bæði hjá Loftleiðum og luku starfsferlinum hjá Cargolux.Egill Aðalsteinsson

„Ég var eins og sjómannskona. Hann var alltaf í burtu,“ segir Salvör Þormóðsdóttir.

„Við vorum mikið í burtu fyrstu árin,“ segir eiginmaðurinn Björn Sverrisson, fyrrverandi flugvélstjóri.

„Þeir komu heim kannski eftir þriggja vikna túr í einn sólarhring. Og svo fóru þeir aftur. Maður náði ekki að þvo fötin. Þannig að vorum dálítið mikið svona einar, konurnar á sínum tíma,“ segir Salvör.

Íslendingar í hópi fyrrverandi starfsmanna Cargolux hittast reglulega á kaffihúsi í Lúxemborg. Frá vinstri: Ólafur Gunnlaugsson flugstjóri, Björn Finnbjörnsson flugstjóri, Gylfi Tryggvason flugvirki, fyrrverandi deildarstjóri viðhaldsdeildar Cargolux, Tómas Eyjólfsson flugstjóri, Hermann Friðriksson flugstjóri, Sigurður Lárusson, fyrrverandi deildarstjóri tækjadeildar Cargolux, Guðlaugur Guðfinnsson flugvirki, Arnar Bjarnason flugvélstjóri, Jóhannes Kristinsson flugstjóri. Lengst til hægri sést aðeins í Agnar Sigurvinsson.Egill Aðalsteinsson

Venjulegir íslenskir alþýðustrákar, sem alist höfðu upp á afskekktri eyju í Norður-Atlantshafi, voru farnir að fljúga um allan heim.

„Þetta var algjört ævintýri,“ segir Jóhannes Kristinsson, fyrrverandi flugstjóri.

Agnar Sigurvinsson, fyrrverandi flugvélstjóri og flugvirki, sýnir hvar fyrstu húsakynni Cargolux voru á Findel-flugvelli.Egill Aðalsteinsson

Flestir litu á starfið í Lúxemborg sem skammtímaverkefni, til tveggja eða í mesta lagi til fimm ára.

Canadair CL 44-flugvélar Cargolux á Findel-flugvelli í Lúxemborg. Þær komu frá Loftleiðum, sem voru eina flugfélagið sem nýtti þær til farþegaflutninga og nefndu Rolls Royce 400.Cargolux

Meira en hálfri öld síðar lýsa Íslendingarnir því hversvegna þeir ílentust í Lúxemborg en sneru ekki aftur heim til Íslands.

Hér má sjá ellefu mínútna kafla:

Þetta er fyrri þáttur af tveimur um íslensku flugnýlenduna. Þátturinn verður endursýndur á Stöð í dag, sunnudag, klukkan 17:40. 

Seinni þátturinn um Lúxemborgarnýlenduna verður sýndur á Stöð 2 næstkomandi þriðjudagskvöld.

Áskrifendur Stöðvar 2 og Stöðvar 2+ geta séð þættina um Flugþjóðina í streymisveitu Stöðvar 2 hvar og hvenær sem er.

Hér er kynningarstikla þáttanna:

Flugþjóðin Lúxemborg Íslendingar erlendis Fréttir af flugi Icelandair

Tengdar fréttir

Gullaldarárin þegar flugið varð stór uppspretta þjóðartekna

Loftleiðabyggingarnar á Reykjavíkurflugvelli eru helsta táknmynd þess peningaflæðis sem fylgdi sókn Íslendinga inn á alþjóðlegan flugmarkað á árunum milli 1960 og ‘70 og gerði flugið að einum þýðingarmesta þætti efnahagslífsins.

Flugvélarnar sem gerðu Loftleiðir að stórveldi

Velgengni Loftleiða í Norður-Atlantshafsfluginu hófst fyrir alvöru með DC 6B-flugvélum. Það voru hins vegar Rolls Royce 400-skrúfuþoturnar, CL-44, eða monsarnir, sem gerðu Loftleiðir að stórveldi í íslensku efnahagslífi.

Mest lesið


Fleiri fréttir

Sjá meira


×

Mest lesið