Ís­lendingurinn á bak við tug­milljarða myndina: „Þetta er eigin­lega fram úr öllum vonum“

Síðan kvikmyndin Minecraft, byggð á samnefndum tölvuleik, kom út þann 4. apríl hefur hún verið sú allra vinsælasta í flestum kvikmyndahúsum. Myndin nálgast að hafa grætt 100 milljarða króna í miðasölu um allan heim og hafa atriði úr myndinni tekið yfir internetið.

Einn af framleiðendum myndarinnar er Torfi Frans Ólafsson. Hann segir það mjög ánægjulegt hve vinsæl myndin er.

„Oft leit það út fyrir að myndin myndi aldrei koma út, eins og gengur og gerist. Við vorum með Covid, verkföll hjá leikörum og handritshöfundum. Svo gáfum við út stiklu og henni var ekki vel tekið svo við vorum ekki viss hvort þetta væri rétt mynd. En við ákváðum að spýta í lófana og reyna að útskýra betur í gegnum stiklurnar hvernig myndin væri í raun og veru. Þetta er eiginlega fram úr öllum vonum,“ segir Torfi.

Torfi vinnur hjá Mojang sem framleiðir tölvuleikinn og sá meðal annars til þess að myndin væri í takt við það sem gerist í leiknum og að markaðssetningin næði til spilara. Þá fékk hann að setja sitt mark á myndina með ýmsum bröndurum. Þar á meðal var brandari þar sem þjónn spyr hvort matargestur sé búinn að borða (e. finished). Hinn gesturinn svarar „Nei, ég held hann sé sænskur.“ 

„Konunni minni þykir þetta mjög lélegur brandari, en fólk hlær að honum. Ég sit stundum aftast í kvikmyndahúsum og sé hvernig viðbrögðin eru,“ segir Torfi. 

Kjúllaknapinn geðugi

Fjallað hefur verið um hegðun bíógesta í ákveðnu atriði myndarinnar um allan heim, meðal annars hér á landi. Þar birtist svokallaður kjúllaknapi (e. chicken jockey) og missa áhorfendur oft vitið við það, klappa og kasta poppi.

Torfi segir framleiðendurna ekki hafa órað fyrir að viðbrögðin yrðu slík yfir þessum kjúllaknapa.

„Að kasta poppi, eða vera með skrílslæti í bíó. Það er ótrúlega gaman þegar fólk er að haga sér vel en er samt að hrópa og taka þátt í kvikmyndinni,“ segir Torfi.