Í dag fer fram Norðurlandamótið í hermiakstri, FIA Nordic Esport Championship 2025, hér á Íslandi. Akstursíþróttasamband Íslands (AKÍS) stendur að mótinu og verður gestgjafi keppenda frá Noregi, Svíþjóð, Finnlandi og Danmörku.
Alls taka tuttugu keppendur þátt í mótinu, fjórir frá hverju landi, og verður keppt í tveimur flokkum: AMG Mercedes GT3 og FIA F4.
Ísland sendir öflugt lið til leiks en þeir Sigurgeir Lúðvíksson og Hákon Jökulsson keppa í GT3-flokknum, en Roland Alfredsson og Gunnar Karl Vignisson í F4. Þessir fjórir unnu sér sæti í landsliðinu eftir opnar tímatökur sem fram fóru fyrr í apríl.
Allir íslensku keppendurnir hafa mikla reynslu af hermiakstri, en Sigurgeir og Hákon kepptu meðal annars fyrir Íslands hönd á FIA Motorsport Games 2024 í Valencia á Spáni. Roland, sem búsettur er í Lettlandi, hefur vakið athygli víða og er aðeins 15 ára gamall.
Keppnin fer fram í húsakynnum GT Akademíunnar að Faxafeni 10 og hefst klukkan 10:00 með undankeppnum.
Húsið verður opið almenningi, og einnig verður hægt að fylgjast með keppninni í beinni útsendingu hér á Vísi og Stöð 2 Vísi.
Úrslitariðlar hefjast klukkan 13:00 og að þeim loknum verður ljóst hvaða þjóð stendur uppi sem Norðurlandameistari í hermiakstri árið 2025.
