Bæði mörkin á Hlíðarenda í gær komu af vítapunktinum. Fyrst krækti Stígur Diljan Þórðarson í víti og þó að Gylfi Þór Sigurðsson væri á svæðinu þá var það Helgi Guðjónsson sem tók spyrnuna og skoraði af miklu öryggi.
Í viðtali eftir leik setti Gylfi spurningamerki við dómgæsluna í jöfnunarmarki Valsara sem fengu að taka aukaspyrnu fljótt og uppskáru í kjölfarið víti þegar brotið var á Jónatani Inga Jónssyni. Patrick Pedersen skoraði úr spyrnunni.
Í Safamýri skoruðu Kennie Chopart og Kyle McLagan tvö góð skallamörk í fyrri hálfleiknum. Þriðja markið var svo umdeilt en það skoraði Vuk Oskar Dimitrijevic eftir að gestirnir úr Mosfellsbæ töldu Framara hafa brotið af sér.
Í Garðabænum skoraði Bjarki Björn Gunnarsson glæsimark, í slá og inn, og kom ÍBV í 2-0 eftir skrautlegt sjálfsmark heimamanna. Sindri Þór Ingimarsson minnkaði muninn með ekki síður furðulegu marki þegar Marcel Zapytowski missti boltann einhvern veginn á milli fóta sér. Oliver Heiðarsson kom svo ÍBV í 3-1 áður en Sindri minnkaði muninn í blálokin með sínu öðru marki en þetta voru hans fyrstu mörk í efstu deild.
