Persónu­legar á­stæður fyrir brott­hvarfi Vé­steins

Stórt skref var tekið í um­hverfi af­rek­starfs í íþróttum hér á landi í gær þegar Af­rek­smiðstöð Ís­lands, stjórnstöð af­reksíþrótta hér á landi var ýtt úr vör. En opnun af­rek­smiðstöðvarinnar fylgdu aðrar stórar fréttir því Vé­steinn, sem gegnt hefur starfi af­reks­stjóra ÍSÍ við góðan orðstír undan­farin tvö ár lætur af störfum og tekur við stöðu ráðgjafa innan af­rek­smiðstöðvarinnar.

Það er af persónu­legum ástæðum sem Vé­steinn breytir nú um vett­vang innan ÍSÍ. Kristín Birna Ólafsdóttir tekur við sem afreksstjóri en hún hefur starfað sem sérfræðingur á afrekssviði ÍSÍ síðan 2018, undanfarin tvö ár með Vésteini.

„Það eru persónu­legar ástæður fyrir því að ég verð bú­settur er­lendis og kem til landsins öðru hvoru, fylgi þessu verk­efni eftir og hjálpa þessu flotta fólki að inn­leiða þetta. Ég er stoltur af því sem ég hef inn­leitt á þessum tveimur árum í starfi. Samningur minn við ráðu­neytið rann út í síðustu viku og úr varð smá tíma­punktur sem passar bara vel við að ég fari í starf á bak við tjöldin og starfi meira beint með íþrótta­fólkinu sjálfu sem og þjálfurunum. Það er eigin­lega þar sem að ég er bestur.

Þegar að maður er kominn á þennan aldur og búinn að keyra þetta áfram finnst mér eðli­legt að flott fólk, yngra en ég, eins og Kristín Birna taki við. Hún er vel í stakk búin í að taka við þessu, hefur verið með mér í tvö ár núna og ég hef rosa­lega mikla trú á unga fólkinu. Unga fólkið leiðir þetta inn í framtíðina með reynslu­bolta á bak við sig. Þess vegna erum við að ráða inn flotta pró­fessora og doktora í vinnu. Síðan er ég reynslu­bolti í íþrótta­hreyfingunni og verð þá meira á bak við tjöldin. Hjálpa til við að sjá til þess að þetta fari allt vel fram og verði gert eins og á að gera. Ég treysti þessu unga fólki alveg full­kom­lega fyrir því að leiða þetta áfram. Við erum að fara ráða fleiri inn og vonandi ungt lið líka. Þetta er góð blanda af reynslu­boltum og ungu fólki.“