Tottenham vann Evrópudeildina

Tottenham vann Manchester United 1-0 í úrslitaleik Evrópudeildarinnar og tryggði sér um leið sæti í Meistaradeildinni á næsta tímabili. Luke Shaw skoraði sjálfsmark sem reyndist eina mark leiksins, þrátt fyrir góðar tilraunir United til að jafna. Þetta er þriðji Evróputitill í sögu Tottenham en fyrsti stóri titill sem félagið vinnur síðan 2008.

Fyrri hálfleikurinn bauð upp á lítið fjör og fá færi fram að markinu. Liðin fengu sitt hvoran sénsinn, Amad Diallo skaut rétt framhjá eftir hornspyrnu og Andre Onana varði skot sem Brennan Johnson tók af stuttu færi eftir að hafa unnið boltann á vallarhelmingi United.

Sjálfsmark hjá Shaw

Tottenham tók forystuna rétt fyrir hálfleik. Eftir fína sókn upp vinstri vænginn átti Pape Sarr fyrirgjöf sem Brennan Johnson réðst á, en það var Luke Shaw sem setti boltann óvart í eigið net. Markið má sjá í spilaranum hér fyrir neðan.

Línubjörgun um miðjan seinni hálfleik

Tottenham fór því með forystuna inn í hálfleikinn og varði hana af hörku í seinni hálfleik.

Rasmus Höjlund var næstum því búinn að jafna metin með skalla á markið á 68. mínútu en Micky Van de Ven kastaði sér fyrir og hreinsaði af línu.

Línubjörgunin gaf United mönnum aukna trú og þeir blésu til betri sóknar. Gerðu tvöfalda breytingu á liðinu og hresstu upp í hlutunum. Alejandro Garnacho kom inn á og átti gott skot á markið sem var varið.

Tottenham varðist hins vegar með alla sína ellefu menn á eigin vallarhelmingi, sem gerði United erfitt fyrir.

Þrátt fyrir sjö mínútna uppbótartíma tókst United ekki að skapa sér færið sem liðið þurfti. Vel skipulögð vörn Tottenham kom í veg fyrir það.

Luke Shaw reyndi að bæta upp fyrir sjálfsmarkið og átti frábæran skalla úr síðustu sókn leiksins, en Vicario var vel vakandi og varði. United fékk reyndar hornspyrnu síðan, og sendi meira að segja markmanninn Andre Onana fram, en ekkert kom upp úr henni.

Tottenham hélt út, fagnaði 1-0 sigri og varð Evrópudeildarmeistari. Gleðin var gríðarleg á Ölveri þegar stuðningsmannaklúbbur Tottenham sá liðið vinna Evrópudeildina.