Man. United gat ekki neitt en græddi samt meiri pening

Það hefur ekki verið mikið um góðar fréttir af fjárhagsstöðu United að undanförnu og því geta stuðningsmenn fagnað góðum fréttum í lok vikunnar.

Liðið hefur aldrei staðið sig verr í ensku úrvalsdeildinni og vann engan titil á tímabilinu. Þrátt fyrir að liðið gæti ekki neitt í deildinni þá græddi félagið samt meiri pening. ESPN segir frá.

Tekjur félagsins eru nefnilega meiri en áætlanir gerðu ráð fyrir. Í stað þess að fá tekjur á bilinu 145 til 160 milljónir punda eins og stóð í fjárhagsætluninni þá er nú búist við því að á bilinu 180 til 190 milljónir punda koma inn í kassann.

Miklu munar um gott gengi í Evrópudeildinni en tekjur af miðasölu jukust um meira en fimmtíu prósent. United græddi 44,5 milljónir punda á miðasölu á fyrstu þremur mánuðum þessa árs.

„Við áttum erfitt tímabili í ensku úrvalsdeildinni og uppskeran var langt fyrir neðan okkar standard. Við búumst um leið við miklum framförum á næstu leiktíð,“ sagði framkvæmdastjórinn Omar Berrada í yfirlýsingu frá félaginu.

United náði líka að lækka launakostnaðinn um tuttugu milljónir punda, niður í 71,2 milljónir punda en þar munaði mestu um enga Meistaradeildarbónusa og að félagið losaði sig við launaháa leikmenn í janúar.