Tottenham festir fyrstu kaup í stjóratíð Frank

Kaupverðið er talið vera 35 milljónir evra, plús 10 milljónir í árangurstengdum greiðslum. Upphaflega var samkomulag milli félaganna um 55 milljóna evra kauprétt, en fallið var frá því og félögin endursömdu sín á milli.

Tel var kynntur sem leikmaður Tottenham snemma í morgun, hann skrifaði undir samning til ársins 2031.

Tel var lánsmaður í liði Tottenham frá því í janúar, tók þátt í alls tuttugu leikjum og skoraði þrjú mörk. Hann var hluti af liðinu sem vann Evrópudeildina í vor og batt enda á sautján ára bið Tottenham eftir titli.

Ange Postecoglou þjálfaði Tottenham þá en var látinn fara fljótlega eftir tímabilið. Thomas Frank tók við hans störfum og hefur nú fest fyrstu kaupin.

Tel spilaði 83 leiki á sínum tíma hjá Bayern og gerðist yngsti markaskorari í sögu félagsins þegar hann skoraði eitt af fimm mörkum í stórsigri gegn Viktoria Köln í ágúst 2022. Aðeins 17 ára og 126 daga gamall. 

Hann á að baki átta leiki fyrir u21 árs landslið Frakklands og er hluti af hópnum sem tekur nú þátt í Evrópumóti u21 árs landsliða.