Tómas í ein­vígi við Frakka en Logi úr leik í bráða­bana

Eftir tvo daga af höggleik, og bráðabana þar sem 24 kylfingar kepptu um fimm síðustu lausu sætin, er Tómas einn af 64 kylfingum sem eftir standa á mótinu.

Nú tekur við holukeppni þar sem Tómas mætir Frakkanum Paul Beauvy í 64 manna úrslitum. Ljóst er að Tómas mun þurfa að hafa sig allan við gegn Beauvy sem lék hringina tvo í höggleiknum á samtals -6 höggum og varð í 6. sæti en Tómas lék samtals á -2 höggum og varð í 58. sæti.

Eins og fyrr segir var Logi Sigurðsson afar nálægt því að komast einnig í 64 manna úrslitin en hann var einn af 24 kylfingum sem léku hringina tvo á samtals -1 höggi og urðu jafnir í 60. sæti. Á fyrstu holu bráðabanans fékk Logi par en eftir skolla á næstu holu, átjándu holu vallarins, var hann úr leik.

Fjórir aðrir íslenskir kylfingar léku á mótinu. Gunnlaugur Árni Sveinsson endaði í 105. sæti á +1 höggi, Veigar Heiðarsson í 155. sæti á +4 höggum, Dagbjartur Sigurbrandsson í 183. sæti á +5 höggum og Guðjón Frans Halldórsson í 206. sæti á +6 höggum en alls tóku 288 kylfingar þátt.

Leikur Tómasar og Beauvy hefst núna í hádeginu og er hægt að fylgjast með stöðunni með því að smella hér.

Sýn verður með beina útsendingu tvo síðustu keppnisdaga mótsins, á föstudag og laugardag, á Sýn Sport 3.