Móður­fé­lag út­gefanda Moggans tapaði hundruðum milljóna

Þórsmörk á nær allt hlutafé í Árvakri hf., útgefanda Morgunblaðsins, og fjórum öðrum félögum að öllu eða langmestu leyti, þar á meðal prentsmiðju blaðsins og Póstdreifingu ehf.

Tap samstæðu Þórsmerkur nam um 348,5 milljónum króna í fyrra en móðurfélagsins sjálfs 340,1 milljón króna samkvæmt ársreikningi félagsins. Móðurfélagið tapaði meira en tvölfalt meiru árið 2024 en árið áður þegar tapið nam 149,2 milljónum króna.

Eigið fé nam rúmum 753 milljónum króna og eiginfjárhlutfall 38 prósentum. Hlutfallið lækkaði um rúm þrjú prósentustig á milli ára. Skuldir félagsins námu tæpum 3,3 milljörðum í fyrra og hækkuðu um tæpar 140 milljónir á milli ára.

Félagið greiðir ekki tekjuskatt í ár þar sem tekjuskattstofn þess var neikvæður.

Árvakur sjálfur tapaði 276,7 milljónum króna í fyrra samkvæmt ársreikningi hans. Jókst tapið um tæpar 237 milljónir króna frá árinu 2023. Þórsmörk á 99,71 prósent hlutafjár í Árvakri en Legalis sf., félag Sigurbjörns Magnússonar, eins eigenda lögfræðistofunnar Juris og stjórnarformanns Árvakurs í áraraðir, á 0,29 prósent.

Stjórnendur Ísfélagsins koma inn

Hlutafé í Þórsmörk var aukið um 266 milljónir króna á árinu. Nokkrir af stærstu einstöku hluthöfunum bættu við sig hlutafé, þar á meðal Íslenskar sjávarafurðir, Hlynur A ehf og Í fjárfestingar ehf.

Hluthöfum í félaginu fjölgaði um tvo í fyrra og eru þeir nú fjórtán. ÍV fjárfestingafélag er nú orðið fjórði stærsti hluthafi Þórsmerkur með rúmlega 13 prósent hlut. Það félag er í eigu Guðbjargar Matthíasdóttur útgerðarkonu úr Vestmannaeyjum og fjölskyldu. Félagið var óbeinn hluthafi í Þórsmörk árið 2023 í gegnum Ísfélagið sem er ekki lengur á meðal hluthafa Þórsmerkur. 

Guðbjörg og fjölskylda eiga einnig Hlyn A. Samtals eiga félögin tvö í þeirra eigu um þriðjung hlutafjár í Þórsmörk.

Þá bættist Marteinn Haraldsson ehf., útgerðarfélag sem er meðal annars í eigu Ólafs Helga Marteinssonar, aðstoðarforstjóra Ísfélagsins og fyrrverandi formanns Samtaka fyrirtækja í sjávarútvegi, og Gunnar Sigvaldason, stjórnarmaður og hluthafi í Ísfélaginu, í hóp tíu stærstu hluthafa Þórsmerkur í fyrra. 

Fari ehf., félag Jóns Pálmasonar sem á meðal annars húsgagnaverslunina IKEA, er nú einnig á listanum yfir helstu hluthafa Þórsmerkur. Félagið á rúmlega hálf prósent.

Ramses II, félag Eyþórs Arnalds, fyrrverandi borgarfulltrúa Sjálfstæðisflokksins, er enn á lista yfir tíu stærstu hluthafa Þórsmerkur.

Heimild til að hækka hlutafé um 600 milljónir

Aðalfundur Þórsmerkur samþykkti í lok maí að breyta samþykktum félagsins þannig að stjórn þess fái heimild til þess að hækka hlutafé um allt að 600 milljónir króna að nafnvirði. Í fyrri samþykkt félagsins var heimild til að hækka hlutaféð um 133,4 milljónir króna.

Stjórn félagsins lagði til við aðalfund að ekki yrði greiddur út arður og að tap félagsins í fyrra yrði flutt til næsta árs.