Hiti að tuttugu stigum og hlýjast sunnan­til

Þetta kemur fram í hugleiðingum veðurfræðings á vef Veðurstofunnar. Þar segir að gera megi ráð fyrir norðaustan golu eða kalda en sums staðar geti myndast strekkings vindstrengir, til dæmis á sunnanverðu Snæfellsnesi og jafnvel Barðaströnd.

Einnig mjög staðbundnir strengir undir Vatnajökli, eins og til dæmis í nágrenni Kvískerja.

Súld eða rigning norðan- og austanlands, Lengst af þurrt suðvestantil en búast má við síðdegisskúrum þar. Hiti 8 til 20 stig, hlýjast sunnanlands.

Norðaustlægar og síðar norðlægar áttir í vikunni og eykst úrkoma um og eftir miðja viku. Kólnar heldur.

Veðurhorfur á landinu næstu daga

Á þriðjudag: Norðaustan og norðan 5-13 og rigning eða súld með köflum, einkum austanlands. Þurrt að mestu suðvestanlands, en líkur á stöku síðdegisskúrum. Hiti 9 til 18 stig, hlýjast suðvestanlands.

Á miðvikudag: Norðlæg eða breytileg átt og lítilsháttar væta norðan- og austanlands. Víða skúrir síðdegis. Hiti 9 til 16 stig, hlýjast suðvestanlands.

Á fimmtudag: Fremur hæg austlæg átt en 8-13 á Vestfjörðum. Rigning, einkum sunnantil. Hiti 8 til 14 stig.

Á föstudag: Ákveðin norðanátt, einkum norðvestantil. Rigning en úrkomuminna um kvöldið. Hiti 7 til 13 stig, mildast austanlands.

Á laugardag: Hæg norðlæg eða breytileg átt. Skýjað og úrkomulítið fyrir norðan, en bjart með köflum syðra. Hiti 6 til 14 stig, hlýjast sunnanlands.

Á sunnudag: Útlit fyrir austantátt með smá vætu, einkum sunnan- og austantil. Hiti 8 til 17 stig, hlýjast suðvestanlands.