Orri skilaði þremur úr horninu í miklum markaleik

Sporting byrjaði leikinn illa og lenti á eftir gestunum en vann sig fljótt inn í leikinn og var komið með fimm marka forystu þegar fyrri hálfleik lauk, staðan þá 20-15, sem er slatti en seinni hálfleikurinn bauð upp á enn meiri skemmtun.

Sporting hélt þeirri fimm marka forystu þó nánast allan tímann og Kielce tókst ekki að gera leikinn spennandi, þó skemmtilegur hafi hann sannarlega verið. Lokatölur 41-37 og Orri skoraði þrjú mörk úr vinstra horninu.

Veszprém vann án Bjarka og Ágúst fékk skot á sig

Tveir aðrir leikir fóru fram í Meistaradeildinni síðdegis.

Veszprém vann frækinn fimm marka sigur gegn franska liðinu Nantes, lokatölur 30-25 í Ungverjalandi. Bjarki Már Elísson er leikmaður Veszprém en kom ekki við sögu í leiknum.

Fuchse Berlin vann 31-28 gegn danska liðinu Aalborg. Heimamenn í Þýskalandi náðu góðri forystu í fyrri hálfleik og létu hana ekki af hendi í þeim seinni.

Ágúst Elí Björgvinsson er markmaður Aalborg ásamt Niklas Landin og Fabian Norsten. Ágúst fékk eitt skot á sig í leiknum en varði það ekki.

Ísak varði vel og Dagur skoraði þrjú í Noregi

Tveir leikir fóru fram í þriðju umferð norsku úrvalsdeildarinnar í dag. Drammen vann sinn þriðja leik í röð, 30-26 gegn Sandnes og OIF Arendal tapaði 29-30 fyrir Runar.

Ísak Steinsson stóð í marki Drammen hluta leiks og varði sjö skot (39%) en fékk á sig 11 mörk. Dagur Gautason skoraði þrjú mörk í tapi Arendal.

Jafnt hjá Ými í Þýskalandi

Stuttgart og Göppingen mættust í fimmtu umferð þýsku úrvalsdeildarinnar og gerðu 28-28 jafntefli eftir æsispennandi leik. Línumaðurinn Ýmir Örn Gíslason skoraði þrjú mörk úr þremur skotum fyrir Göppingen, sem situr í sjöunda sæti.

Donni næstmarkahæstur í Danmörku

Skanderborg vann 36-29 gegn Hoj í fjórðu umferð dönsku úrvalsdeildarinnar. Kristján Örn Kristjánsson, Donni, var næstmarkahæstur allra í leiknum með sjö mörk. Jon Hansen gerði betur og skoraði heil ellefu mörk.