Viðskipti innlent

Veitinga­staðurinn opinn en lónið opnar síðar

Lovísa Arnardóttir skrifar
Gott útsýni er yfir Hvítá.
Gott útsýni er yfir Hvítá. Laugarás Lagoon

Búið er að opna veitingastaðinn Ylju í nýju baðlóni í Laugarási í Biskupstungum. Baðlónið opnar síðar í þessum mánuði. Matreiðslumaðurinn Gísli Matthías Auðunsson er yfirkokkur og hannaði matseðil veitingastaðarins. Baðlónið er sjálft á tveimur hæðum og er aldursviðmið átta ára.

„Á Ylju bjóðum við upp á árstíðarbundinn matseðil og leggjum mikla áherslu á að nota hráefni héðan úr sveitinni,“ segir Bryndís Björnsdóttir framkvæmdastjóri lónsins og að allir sem komi í mat fyrir opnun geti fengið að skoða bæði lónið og aðra aðstöðu.

Gísli Matt er yfirkokkur á Ylju og hannaði matseðilinn með tilliti til nærumhverfis lónsins. Laugarás Lagoon

„Gísli er einn öflugasti matreiðslumaður landsins og nýtir hráefnin í nærsamfélaginu á óhefðbundinn hátt,“ segir Bryndís og að hann vinni náið með gróðurhúsunum sem staðsett eru í þorpinu.

„Við kaupum frá flestum þeirra og munum gera það áfram. Það er til dæmis tómata-carpaccio á matseðli sem er með tómötum frá þremur ólíkum ræktendum.“

Í Laugarási eru reknar nokkrar gróðurstöðvar. Það eru til dæmis Storð, Hveratún og Heiðmörk.

Tómata carpaccioið á matseðlinum. Laugarás Lagoon

Nafnið á veitingastaðnum vísar í hverasvæðið í Laugarási og að öll byggðin samtvinnist í kringum heita vatnið sem er þar. Þess vegna séu gróðurhúsin þarna og þess vegna séu þarna.

„Það er þessi uppspretta á heita vatninu sem er kveikjan að þessu nafni,“ segir hún og að lónið sjálft sé einstök baðupplifun.

„Laugarás er þorp sem kannski ekki allir Íslendingar þekkja en er með skemmtilega sögu. Það er mikil gróðursæld hér sem snýr að gróðurhúsaræktun sem hefur verið í gangi hér síðan 1960. Við erum búin að hanna upplifun sem á að tryggja að gestir fái góða tengingu við náttúruna í kring.“

Lónið er staðsett við skóg og er því nokkuð skjólsælt þar. Laugarás Lagoon

Lónið er í jaðri skógar auk þess sem útsýni er yfir Hvítá og Stóru-Laxá sem koma saman við lónið. Þá er einnig útsýni yfir Vörðufell.

„Baðlónið er á tveimur hæðum, sem er ólíkt þeim lónum sem eru fyrir á landinu,“ segir Bryndís en eins og má sjá af myndinni að neðan er stigi í miðju lóninu sem tengir hæðirnar saman. Fari fólk niður gengur það í gegnum foss inn á neðri hæð lónsins. Við lónið er svo bæði að finna bæði þurr- og blautgufu.

Einn vinsælasti áfangastaður Laugaráss síðustu ára er dýragarðurinn Slakki. Hann opnar yfirleitt um páska og er opinn yfir sumarið. Garðurinn er vinsæll áfangastaður fjölskyldna sem eiga leið um svæðið eða gista í bústað í nágrenninu. Bryndís segir að fjölskyldur muni geta samþætt heimsókn sína í lónið og í dýragarðinn. Það sé átta ára aldursmark í lónið sjálft en öllum heimilt að koma á veitingastaðinn.

Veitingastaðurinn er opin.Laugarás Lagoon
Bæði er blaut- og þurrgufa í lóninu. Laugarás Lagoon





Fleiri fréttir

Sjá meira


×