Ólöf og Írena báðar í úr­vals­liði Ivy-deildarinnar

Þær voru báðar valdar í annað úrvalslið Ivy-deildarinnar en þá deild skipa margir af virtustu skólum Bandaríkjanna en hinir eru Brown University, Columbia University, Cornell University, Dartmouth College, University of Pennsylvania, Princeton University og Yale University.

Harvard-skólaliðið átti marga fulltrúa í úrvalsliðunum, einn í fyrsta liðinu og fimm til viðbótar í öðru liðinu.

Írena var mjög traust sem varnarsinnaður miðjumaður og byrjaði alla leiki Harvard nema einn árið 2025.

„Þessi þriðja árs nemi lagði sitt af mörkum um allan völl, þar á meðal í sókninni þar sem hún skoraði eitt mark og gaf eina stoðsendingu. Í vörninni hjálpaði Íslendingurinn til við að stöðva sóknarmenn andstæðinganna með sterkum varnarleik sínum. Valið í annað liðið er fyrsta All-Ivy-viðurkenning Héðinsdóttur Gonzalez á ferlinum,“ segir í frétt á heimasíðu Harvard.

Ólöf Sigríður, eða Olla eins og við þekkjum hana best, var að koma til baka eftir krossbandsslit. Hún sleit krossband þegar hún var heima á Íslandi sumarið 2024 og missti af öllu 2024-tímabilinu með Harvard. Það var því mikilvægt fyrir hana að stimpla sig aftur inn.

„Kristinsdóttir var valin í annað liðið í annað sinn á ferlinum, en hún skoraði þrjú mörk og gaf eina stoðsendingu árið 2025 og lagði þannig sitt af mörkum til sóknarleiks Harvard. Besta frammistaða hennar á tímabilinu var í 2-0 sigri á Princeton (27. september) þar sem hún skoraði bæði mörk Crimson-liðsins og leiddi liðið til sigurs. Fyrir þann leik var hún valin sóknarmaður vikunnar í Ivy League-deildinni,“ segir í frétt á heimasíðu Harvard.