Þota hreinsaði nánast upp bið­lista í Egilsstaðafluginu

Í fréttum Sýnar mátti sjá flugvélarnar streyma út og inn á Reykjavíkurflugvelli í dag. Þannig lenti Dash 8-vél Icelandair frá Ísafirði um hádegisbil en þangað hafði ekki verið hægt að fljúga frá því á laugardag. Hún var nánast fullsetin farþegum að vestan. Setið var í 35 sætum af 37 um borð.

Norlandair tókst einnig í morgun að komast í sitt fyrsta áætlunarflug til Vestmannaeyja, sem og til annarra áfangastaða.

En hjá Icelandair var það Boeing-þotan sem gerði gæfumuninn í gærkvöldi.

„Við fengum 757 til okkar og það náði að taka nánast alla á Egilsstaði,“ sagði Sara Líf Snorradóttir, þjónustustjóri Icelandair á Reykjavíkurflugvelli.

Þotan dugði þó ekki til og sendi Icelandair 76 sæta Dash 8-vél í aukaflug til Egilsstaða í morgun til að hreinsa upp biðlistann. Þá tókst Icelandair að komast á Hornafjörð í dag og Akureyrarflug gekk að mestu samkvæmt áætlun.

„Við bara náum að hreinsa þetta allt upp,” sagði Sara.

Boeing-þotan var í morgun ferjuð frá Reykjavíkurflugvelli til Keflavíkur. Hún flutti í gærkvöldi 184 farþega til Egilsstaða og jafnmarga til baka til Reykjavíkur en þar lenti hún seint í gærkvöldi.

-En kvarta borgarbúar ekkert undan svona þotu? Verðið þið vör við það?

„Nei, alls ekki. Ég hef allavegana ekkert heyrt um það. Ég held að flestum finnist þetta bara spennandi að fá þotuna til okkar.“

-Og farþegunum líka?

„Já, farþegunum svo sannarlega líka,“ svarar þjónustustjóri Icelandair á Reykjavíkurflugvelli.