„Sterkar vís­bendingar“ um minni kostnað með nýrri stefnu

Stefnan sem kynnt var í gær er til ársins 2030 og lýsir fyrirkomulagi lánsfjármögnunar ríkissjóðs á næstu árum. Stefnan byggist að hluta á fyrri stefnu en felur jafnframt í sér nokkrar breytingar að sögn Daða Más Kristóferssonar, fjármála- og efnahagsráðherra. 

Minna verðtryggt og meira óverðtryggt

„Fyrst og fremst snúast þær um að við erum að fjölga viðmiðum og auka upplýsingaflæði. Það eru síðan ákveðnar breytingar á viðmiðum um samsetningu skulda sem eru eiginlega viðbrögð við uppgjörinu á ÍL-sjóði á þessu ári,“ segir Daði.

Bent er á í nýju lánastefnunni að mikil uppstokkun hafi orðið á skuldum ríkissjóðs á árinu í tengslum við uppgjörið sem leitt hafi meðal annars til hærra skuldahlutfalls A1-hluta ríkissjóðs. Skuldahlutfall A-hluta ríkissjóðs sem inniheldur ÍL-sjóð hafi hins vegar lækkað um sex prósentustig vegna uppgjörsins.

Í framhaldi af uppgjörinu bættist verulega í verðtryggðar skuldir ríkisins og við því þarf að bregðast að sögn Daða. „Þannig að við uppfærum viðmiðin en höldum okkur áfram við það að megináherslan er á áframhaldandi útgáfu óverðtryggðra bréfa, en við tryggjum og munum halda áfram að tryggja markað fyrir verðtryggð ríkisskuldabréf líka.“

Þannig gera ný viðmið um skiptingu lána ráð fyrir að óverðtryggð lán nemi um 45% af lánasafni, verðtryggð lán um 40% og lán í erlendri mynt um 15%. 

Aukið upplýsingaflæði sé af hinu góða

„Einnig eru sett fram uppfærð viðmið um útgáfu ríkisbréfa. Lögð er áhersla á skýra verðmyndun með bæði verðtryggða og óverðtryggða flokka ríkisbréfa. Endanleg stærð útgáfuflokka skal að jafnaði vera að lágmarki 50 milljarðar króna til allra tímalengda. Meðallánstími skulda ríkissjóðs er óbreyttur, eða 5–7 ár. Þá er stefnt að því að hlutfall skulda sem falla á gjalddaga á næstu 24 mánuðum verði innan við fjórðungur af heildarskuldum ríkissjóðs,“ segir ennfremur um málið í tilkynningu stjórnarráðsins þar sem nánar er fjallað um nýju stefnuna.

Daði Már segir erfitt að segja til um það nákvæmlega hvaða áhrif ný lánastefna muni hafa á markaðinn, en kveðst bjartsýnn um að þau verði jákvæð. „Ég held að það sé alltaf gott að það sé gott upplýsingaflæði og ég held að markaðsaðilar muni kunna að meta það að við erum að veita meiri upplýsingar. Ég held síðan kannski að stærsta breytingin sé að fara yfir í reglubundna útgáfu í erlendri mynt. Það tengist viðhaldi gjaldeyrisvaraforðans, en við höfum mjög sterkar vísbendingar um að það geti lækkað fjármagnskostnað ríkisins.“