Segir Ís­land eiga tvo af tíu bestu í heimi

Nyegaard hefur um árabil verið helsti sérfræðingur TV 2 um handbolta en hann segir það hafa verið afar vandasamt að taka saman listann, enda sé úrvalið af frábærum handboltamönnum mjög gott.

Skilaboðin voru skýr um að Nyegaard ætti ekki að láta leikmenn græða neitt á fortíðinni. Hér væri um að ræða þá tíu sem væru bestir akkúrat í dag, nú þegar hálfur mánuður er í að Evrópumótið hefjist.

Íslendingarnir á listanum eru Magdeburgar-makkerarnir Gísli Þorgeir Kristjánsson og Ómar Ingi Magnússon. Þeir hafa báðir verið í fantaformi í vetur, í aðalhlutverkum hjá liði sem enn hefur ekki tapað leik í þýsku 1. deildinni.

Segir Gísla stöðugt setja ný viðmið

Í umsögn um Gísla skrifaði Nyegaard: „Íslenska undrið setur stöðugt ný viðmið varðandi það hversu vel hann getur staðið sig í heimi þar sem allir fylgjast sérstaklega með hans helsta styrkleika; einvígi, einvígi, einvígi.

Það hefur kostað meiðsli á leiðinni, en þrátt fyrir alvarleg meiðsli er hugrekki áfram algjörlega afgerandi hluti af persónuleika hans.

Kristjánsson sættir sig heldur ekki við skotnýtingu undir 70 og 80 prósentum. Og svo toppaði hann fögnuðinn yfir Meistaradeildartitlinum með því að vera valinn verðmætasti leikmaður (MVP) keppninnar.“

Ómar með eindæmum snjall og þarf bara hnappagat

Í umsögn um Ómar skrifaði Nyegaard: „Með eindæmum snjall og með yfirsýn sem fáir búa yfir. Strategískur leikmaður sem hefur verið meira en afgerandi fyrir ríkjandi Meistaradeildarmeistara ársins 2025.

Íslendingurinn þarf aðeins opnun á stærð við hið fræga hnappagat og þá finnur hann leiðina. Á minnstu svæðum, oftast fljúgandi rétt yfir gólfinu, tekst honum aftur og aftur að sýna listir sínar. Annaðhvort með því að skora sjálfur eða á síðustu stundu að búa yfir þeirri einstöku yfirsýn að koma liðsfélögum sínum í færi. Hvort sem það er til hægri eða vinstri, þá geturðu verið viss um að sá snjalli finnur bestu lausnina.

Og líkt og hjá liðsfélaga hans, Felix Claar, eru mistök nánast ekki hluti af Magnússon-pakkanum. Innan við einn og hálfur tapaður bolti að meðaltali í leik.“

Nyegaard er með fjóra landa sína á listanum, tvo Frakka, einn Svía og einn Spánverja. Þetta eru þeir Mathias Gidsel, Emil Nielsen, Simon Pytlick, Magnus Saugstrup, Dika Mem, Ludovic Fabregas, Sergey Hernández og Felix Claar.