Töl­fræðin á móti Ung­verjum: Viktor lokaði í átta mínútur þegar ekkert gekk

Íslenska liðið þurfti á stórleik að halda frá markverðinum Viktori Gísla Hallgrímssyni og hann brást ekki í fyrsta leiknum þar sem sóknarleikurinn virkaði einhæfur og bitlítill.

Sóknarleikurinn var lengi í gang og mikið um tapaða bolta í byrjun leiks, eða fjórir á fyrstu sex mínútum leiksins. Þetta var eitthvað allt annað en við höfum séð hingað til í mótinu.

Gísli Þorgeir Kristjánsson fór algjörlega á kostum á kafla í fyrri hálfleik og kom að sjö af fyrstu tólf mörkum liðsins með marki (4) eða stoðsendingu (3). Gísli réðst á vörnina við hvert tækifæri og hélt sókninni uppi í þessum leik.

Ómar Ingi Magnússon nýtti vissulega vítaskotin sín en tók bara eitt skot utan af velli í fyrri hálfleiknum og virkaði hikandi í sínum aðgerðum. Þetta lenti því mikið á Gísla sem auk sjö marka og þriggja stoðsendinga fiskaði fjögur víti með árásum sínum.

Viktor Gísli var síðan stórkostlegur í seinni hálfleiknum og hélt okkur inni í leiknum með því að loka markinu sínu í átta mínútur á meðan ekkert gekk í sóknarleiknum og Ungverjar hefðu auðveldlega getað náð góðu forskoti. Viktor endaði alls með 24 skot varin og eina bestu frammistöðu íslensks markvarðar í svona stórum leik á stórmóti.

Einar Þorsteinn Ólafsson átti líka magnaða innkomu í vörnina þegar Ýmir Gíslason fékk rauða spjaldið og náði sex stoppum og tveimur vörðum skotum. Ekki slæmt að fá þessa innkomu frá þessum frábæra varnarmanni.