Rétt var að svipta Guð­mund Karl lækningaleyfinu

Landlæknir svipti Guðmund Karl lækningaleyfi sínu í fyrra vegna ólögmæts reksturs fjarheilbrigðisþjónustu frá árinu 2023. Taldi embættið að hann hefði brotið alvarlega gegn starfsskyldum sínum og ekki hirt um að bregðast við tilmælum þess.

Guðmundur Karl mótmælti sviptingunni á aragrúa forsendna, meðal annars að lagaákvæði sem veitir heimild fyrir því að heilbrigðisstarfsfólk sé svipt starfsleyfi væri of „opið og óljóst“, landlækni hefði skort lagaheimild til að taka ákvörðunina og að hann hefði aldrei hafið starfsemi fjarlæknisþjónustunnar.

Heilbrigðisráðuneytið hafnaði öllum málsástæðum Guðmundar Karls og staðfesti ákvörðun landlæknis. Benti það á að hann héldi enn áfram að auglýsa þjónustu sína sem hefði þannig augljóslega hafið starfsemi, þvert á skýringar Guðmundar Karls.

Þá benti ráðuneytið á að Guðmundur Karl titlaði sig enn sem læknir, jafnvel eftir að hann var sviptur starfsleyfinu í fyrra. Það væri skýlaust brot á lögum og sýndi að ekki hefði verið tilgangur með því að áminna Guðmund Karl áður en hann var sviptur leyfinu.

Alma Möller, heilbrigðisráðherra, var landlæknir þegar embættið fetti fingur út í starfsemi Guðmundar Karls. Hún lýsti sig því vanhæfa til þess að fjalla um kæru hans.

Jóhann Páll Jóhannsson, umhverfis-, orku- og loftslagsráðherra, var settur heilbrigðisráðherra í kærumálinu. Starfsmenn heilbrigðisráðuneytisins unnu úr kærunni í umboði hans.

Ekki hægt að sjá annað en hann ræki heilbrigðisþjónustu

Guðmundur Karl tilkynnti embætti landlæknis um rekstur fjarheilbrigðisþjónustunnar í mars árið 2023. Embættið taldi tilkynninguna ófullnægjandi og óskaði eftir því að hann sendi inn nýja tilkynningu, ella yrði þeirri fyrri vísað frá. Engin viðbrögð bárust þó frá Guðmundi Karli.

Síðar hélt Guðmundur Karl því fram að hann hefði aldrei hafið neina starfsemi þrátt fyrir að hann hefði vissulega sett upp heimasíðu þar sem kom fram að hann byði upp á læknisþjónustu. Hann hlyti ennfremur að mega eiga símtöl eða önnur samtöl við einstakinga sem til hans leituðu án þes að þá teldist hann reka heilbrigðisþjónustu.

Ráðuneytið gaf lítið fyrir þau rök Guðmundar Karls. Á vefsíðu hans væru enn upplýsingar um læknisþjónustu sem hann byði gegn gjaldi. Þar segði ennfremur að síðan væri enn í smíðum en að bætt yrði við hana síðar, meðal annars með myndbandstengli og stofukomum eftir þörfum.

„Ráðuneytið fær ekki séð hvernig framangreind þjónusta getur talist nokkuð annað en rekstur heilbrigðisþjónustu í skilningi laga [...],“ segir í niðurstöðu ráðuneytisins.

Fram kemur í niðurstöðunni að Guðmundur Karl hafi skrifað á vefsíðuna að Sjúkratryggingar Íslands neituðu að niðurgreiða þjónustuna og að það væri „pólitísk ákvörðun“. Því stillti hann verði viðtala í hóf.

Vildi vísa á sníkjudýralyf gegn Covid-19

Þetta var ekki í fyrsta skipti sem Guðmundur Karl komst upp á kant við heilbrigðisyfirvöld. Í kórónuveirufaraldrinum sóttist hann eftir því að fá að skrifa upp á sníkjudýralyf með enga þekkta virkni gegn veirunni en var synjað um leyfi til þess.

Það kom þó ekki í veg fyrir að Guðmundur Karl auglýsti ávisanir upp á lyfið á samfélagsmiðli. Lyfjastofnun krafðist þess að hann fjarlægði auglýsingarnar og taldi hann hafa framið eitt af alvarlegustu brotum sem til væru gegn lyfjalögum og reglum um lyfjaauglýsingar. Hann neitaði að verða við kröfu stofnunarinnar.

Fréttin hefur verið uppfærð.