Eyja­menn skoruðu fjöru­tíu mörk gegn Sel­fyssingum

HK tók á móti FH í Kórnum í kvöld í leik sem var lengst af mjög spennandi. Leikar stóðu jafnir, 24-24, þegar að rétt rúmar tólf mínútur eftir lifðu leiks en þá náðu FH-ingar að byggja upp tveggja marka forskot sem stóð í þremur mörkum, 28-25, þegar að tæpar átta mínútur voru eftir.

Það bil náðu HK-ingar ekki að brúa þrátt fyrir hetjulega tilraun til þess en leiknum lauk með þriggja marka sigri FH, 29-32. Jakob Martin Ásgeirsson var markahæstur í liði FH í kvöld með sjö mörk en það var HK-ingurinn Sigurður Jefferson Guarino sem var markahæsti maður vallarins með heil tíu mörk. 

Þetta var tíundi sigur FH á tímabilinu og er liðið nú með 21 stig og áfram í fjórða sæti deildarinnar. HK er í 9.sæti með tíu stig. 

Þægilegt hjá Eyjamönnum

Í Vestmannaeyjum tóku heimamenn í ÍBV á móti Selfyssingum í leik sem var aðeins spennandi fyrstu mínútur leiksins. Eyjamenn sýndu mátt sinn og meginn og sigldu heim tólf marka sigri, 40-28. 

Markaskorunin var mjög dreifð hjá Eyjamönnum en það var Sveinn José Rivera sem stóð öðrum framar á þeim vettvangi með sjö mörk úr sjö tilraunum. 

Eyjamenn eru nú með nítján stig í fimmta sæti deildarinnar en munu að öllum líkindum falla niður í það sjötta því KA er langt komið með að sigla heim sigri gegn ÍR í leik sem stendur nú yfir.