Lyfja kaupir vöru­merki Jurtaapóteksins

Kolbrún mun áfram koma að þróun vara Jurtaapóteksins, sem verða aðgengilegar í verslunum Lyfju frá og með 1. mars. Frá þessu er greint í tilkynningu frá Lyfju.

Þar segir Karen Ósk Gylfadóttir, framkvæmdastjóri Lyfju, kaupin á vörumerki Jurtaapóteksins í samræmi við stefnu fyrirtækisins um að efla framboð á hreinum vörum og auka aðgengi að þeim í verslunum Lyfju um land allt. Lyfja áætlar að með kaupum á vörumerkinu aukist framboð á náttúrulegum lausnum hjá fyrirtækinu um rúmlega 20 prósent.

„Lyfja hefur á undanförnum árum lagt aukna áherslu á að bjóða upp á hreinar og náttúrulegar vörur og fellur vörumerki Jurtaapóteksins vel að þeirri stefnu. Þá er mikils virði að Kolbrún komi áfram að þróun á vöruframboði vörumerkisins, enda býr hún yfir áratuga reynslu og þekkingu á þessu sviði. Í samstarfinu verður lögð rík áhersla á að halda í þau gildi sem Jurtaapótekið hefur byggt á frá upphafi,“ segir Karen Ósk.

Tímamót fyrir Jurtaapótekið

Í tilkynningu segir Kolbrún breytingarnar marka tímamót fyrir vörumerki Jurtaapóteksins og viðskiptavini þess.

„Þetta eru mikil tímamót fyrir vörumerki Jurtaapóteksins. Með þessum breytingum skapast stærri vettvangur fyrir þá hugmyndafræði sem hefur mótað vörumerkið frá upphafi. Í þróun vara Jurtaapóteksins höfum við ávallt lagt áherslu á vandað hráefni, skýrt innihald og að forðast óþarfa fylli- og aukaefni, og þau vinnubrögð munu fylgja áfram inn í næsta kafla vörumerkisins,” segir Kolbrún.

Á mynd: Karen Ósk Gylfadóttir, framkvæmdastjóri Lyfju, og Kolbrún Björnsdóttir, grasalæknir og stofnandi Jurtaapóteksins.