Sló í fugl en það dugði ekki til

Eftir annað högg Straka á 18. brautinni skoppaði boltinn nefnilega í einn af þremur fuglum sem sátu í makindum við tjörnina og virtust ekki kippa sér upp við að bestu kylfingar heims væru að keppa um sigur á einu stærsta móti ársins.

Boltinn hafði stefnt út í tjörnina en fór í bak fuglsins og var nálægt því að fara til baka og inn á grasið, eins og sjá má hér að neðan.

Það hefði hjálpað Straka en hann endaði á að spila lokaholuna á tveimur höggum yfir pari, og lokahringinn þar með á -1 höggi.

Straka endaði því á samtals -8 höggum, jafn tveimur öðrum í 8. sæti og hlaut 731.250 dollara í verðlaunafé, eða um 92 milljónir króna.

Kylfingarnir í 5.-7. sæti, þar á meðal Svíinn Ludvig Åberg sem kastaði frá sér forystunni með +4 högga lokahring, fengu 925.000 dollara eða um 116 milljónir króna hver, með því að ljúka mótinu einu höggi á undan Straka.

Cameron Young fagnaði sigri á mótinu, eftir að hafa verið í 3. sæti fyrir lokahringinn, en hann lék samtals á -13 höggum og endaði höggi á undan Matt Fitzpatrick sem fékk skolla á lokaholunni.