Ó­lík­legt að eignir dugi fyrir launa­kröfum

Þetta kemur fram í nýjasta þætti Flugvarpsins, en þar ræddi Jóhannes Bjarni Guðmundsson við Arnar Þór Stefánsson skiptastjóra þrotabúsins. 

Ágreiningur um uppsagnarfrest

Arnar Þór segir að undanfarnir mánuðir hafi farið í að safna saman eignum upp í kröfurnar, meðal annars hafi félagið afturkallað tryggingar, til að mynda á flugvöllum erlendis, og vexti af þeim og innbú félagsins verið selt.

„Þetta er alveg eitthvað en nær, eins og staðan er núna, ekki til að greiða forgangskröfur,“ segir Arnar Þór. 

Til forgangskrafna teljast launakröfur og launatengdar kröfur starfsmanna. Af 21 milljarðs króna kröfum í þrotabúið nema forgangskröfur 1,1 milljarði. Frá því munu dragast laun sem starfsfólk hefur fengið vegna annarra starfa á uppsagnarfresti. 

„Síðan er ágreiningur um uppsagnarfrest. Hvort hann teljist þrír eða fjórir mánuðir. Það þarf að koma í ljós hvernig fer með þann ágreining,“ segir Arnar Þór. Þrotabúið vilji meina að uppsagnarfresturinn hafi varað út desember en launafólk telji hann vara út janúar.

Ábyrgðarsjóður launa, stjórnvald sem starfar samkvæmt lögum, greiðir starfsfólki hluta launanna og gerir síðan sjálfur kröfu í þrotabúið. Þannig verður sjóðurinn aðalkröfuhafinn þegar upp er staðið.

Fram hefur komið að ólíklegt þyki að nokkuð muni fást upp í almennar kröfur á hendur þrotabúinu, en til þeirra teljast meðal annars kröfur skuldabréfaeigenda og kröfur flugfarþega vegna ferða sem ekki voru farnar. 

Arnar Þór segir langflestar slíkar kröfur koma frá erlendum farþegum, þar sem Íslendingar hafi flestir fengið fargjöldin sín endurgreidd í gegnum kortafyrirtækin.

Þetta eru yfir tuttugu milljarðar, fæst upp í forgangskröfur?

„Það mun fást upp í forgangskröfur.“

En ekki að öllu leyti?

„Nei, en það er ekkert útilokað. Eins og ég nefndi í byrjun erum við að reyna að ná utan um eignir. Það sem er þá fram undan og getur skapað búinu fé er að rýna í ráðstafanir í aðdraganda þrots. Ef það eru einhverjir kröfuhafar sem hafa fengið greitt umfram aðra bersýnilega, kann að vera hægt að rifta viðkomandi kröfuhafa þeim greiðslum sem voru greiddar þá umfram aðra kröfuhafa,“ segir Arnar Þór og bendir á að í slíkri riftun felist endurheimt á fjármunum.

Hér er aðeins stiklað á stóru en hægt er að hlusta á þáttinn í heild sinni hér að neðan.