„Við styðjum við bakið á okkar þjálfara“

„Þær voru 1-0 yfir í einvíginu og það gaf okkur auka hvatningu,“ sagði Sara Rún Hinriksdóttir, leikmaður Keflavíkur, eftir öflugan sigur liðsins í kvöld.

„Þetta var skemmtilegur körfuboltaleikur. Hörku lið sem við vorum að keppa á móti og ég er virkilega ánægð með sigurinn.“

Það var stutt á milli hjá liðunum og hefði leikurinn getað dottið beggja megin. Það var ekki fyrr en í lok fjórða leikhluta sem Keflavík kláraði og sigraði leikinn sannfærandi.

„Mér fannst við vera með yfirhöndina allan tímann, það var mín tilfinning. Þetta er sterkt lið sem við erum að keppa á móti og maður getur ekkert slakað á. Við kláruðum leikinn vel og ég er stolt af öllum leikmönnum liðsins og það voru allir einhvernveginn með góða orku.“

Helsta umfjöllun eftir fyrri leik liðanna í einvíginu varðaði fjarveru Harðar Axels sem var á Tenerife daginn fyrir leik. Sérfræðingar Körfuboltakvölds kvenna höfðu nóg um málið að segja og sagði Hallveig Jónsdóttir, þrefaldur Íslandsmeistari og einn af sérfræðingum þáttarins „Þú ert búinn að vera drulla í þig einhvern veginn allt tímabilið og ætlar ekki að vera með í undirbúningi. Ég væri brjáluð sem leikmaður.“

Sara Rún sagði hvorki ferðina né umfjöllunina hafa haft nein áhrif eins og sást í leiknum í kvöld.

„Við vorum allar meðvitaðar um þetta. Arnór, aðstoðarþjálfarinn okkar, var með hörku æfingar á meðan. Þetta hafði engin áhrif á okkur og við styðjum við bakið á okkar þjálfara.“

„Hann naut þess að vera úti með sinni yndislegu fjölskyldu og við erum ánægðar að hann hafi gert það. Hann kom svo þrefalt til baka eins og sást í dag.“

Umræðan utan vallar hafði því engin áhrif á Keflavíkurliðið sem svaraði fyrir tapið og umræðuna með sterkum sigri og jafnaði einvígið.