Mos Def kemur fram í Gamla Bíó í maí

Í tilkynningu frá Live Projects, sem stendur að tónleikunum, kemur fram að Mos Def sé einn áhrifamesti tónlistarmaður sinnar kynslóðar og hornsteinn „conscious hip-hop“-senunnar.

„Hann sló fyrst í gegn seint á 10. áratugnum sem hluti af hip-hop-dúóinu Black Star ásamt Talib Kweli. Með tímamótaplötum á borð við Black on Both Sides og The New Danger mótaði Mos Def nýja sýn á það hvað hip-hop gæti verið: hugmyndaríkt, pólitískt og listilega djúpt. Ferill hans spannar samstarf við listamenn á borð við Kanye West, Hi Tek, Madlib og J Dilla,“ segir í tilkynningunni.

Þar segir einnig að nýtt listamannsnafn hans, Yasiin Bey, marki ekki endurnýjun ímyndar Mos Def heldur afstöðu.

„Nafnið endurspeglar þá hugsjón sem hefur alltaf einkennt feril hans: að nota tónlist sem miðil fyrir merkingu, sannleika og menningarlega ábyrgð.“

Í tilkynningu segir enn fremur að á  sviði sé Yasiin Bey þekktur fyrir einstaka nærveru

„Flutningurinn er hrár og lifandi og inniheldur ófyrirsjáanlega upplifun þar sem hip-hop, spuni, pólitík og persónuleg tjáning renna saman í eitt.“

Bey hefur einnig leikið í kvikmyndunum á borð við Something the Lord Made, Next Day Air, The Hitchhiker's Guide to the Galaxy, 16 Blocks, Be Kind Rewind, The Italian Job, The Woodsman, Bamboozled og Brown Sugar og í sjónvarpsþáttum eins og Dexter og House. Hann var kynnir í Def Poetry Jam frá 2002 til 2007.

Miðasala fer fram á Stubb og er takmarkað magn miða í boði.

Liveproject stóð einnig fyrir tónleikum Mobb Deep sem fram fóru í KR-heimilinu í mars og fjölda annarra viðburða, eins og tónleikum Booka Shade, DJ Shadow, Carl Craig og Talib Kweli í Gamla bíói.