Hættir með Noreg og tekur við Óðni

Nýi þjálfarinn er hinn 49 ára gamli Norðmaður Jonas Wille sem brátt hættir sem landsliðsþjálfari Noregs eftir að hafa stýrt liðinu á fimm stórmótum.

Wille tekur við Kadetten af Hrvoje Horvat en þetta tilkynnti félagið á heimasíðu sinni. 

Óðinn hefur verið algjör lykilmaður hjá svissnesku meisturunum síðustu ár og er með samning við félagið sem gildir til ársins 2030. Hann hefur orðið meistari með liðinu síðustu þrjú ár í röð og átti ríkan þátt í að koma liðinu enn á ný í úrslitaeinvígið um helgina.

Tilkynnt var í mars að Wille myndi hætta með norska landsliðið í sumar en fyrst stýrir hann liðinu í HM-umspilsleikjum gegn Tyrklandi. Norska handknattleikssambandið er í leit að arftaka hans.