Bíó og sjónvarp

Köngulóarmaðurinn slær sögu­legt met

Magnús Jochum Pálsson skrifar
Tom Holland í ofurhetjugallanum við tökur á nýjustu myndinni um Köngulóarmanninn.
Tom Holland í ofurhetjugallanum við tökur á nýjustu myndinni um Köngulóarmanninn. Getty

Nýjasta kvikmyndin um Köngulóarmanninn sló um helgina sögulegt met sem stórmyndin Avengers: Endgame átti. Köngulóarmaðurinn rakaði inn 360 milljónum dala í Bandaríkjunum sem er stærsta opnunarhelgi sögunnar þar í landi. Á heimsvísu halaði myndin inn rúmum 930 milljónum dala og stefnir í að verða með best sóttu kvikmyndum sögunnar.

Um er að ræða Spider-Man: Brand New Day, fjórðu kvikmyndina með Tom Holland í aðalhlutverki vinalegu ofurhetjunnar. Ekki nóg með að vera vel sótt heldur hefur kvikmyndin einnig fengið fína dóma hjá gagnrýnendum með um 89% prósent ferskleika hjá Rotten Tomatoes, meðaleinkunnina 6,6 á síðunni Metacritic sem safnar saman dómum gagnrýnenda og 8,2 á vinsælu bíósíðunni IMDB.

Brand New Day var sýnd í 2.487 bíósölum í Norður-Ameríku um helgina og seldust bíómiðar þar fyrir 360 milljónir dala. Þar með bætti kvikmyndin fyrra metið, sem Avengers: Endgame átti með 357,1 milljón dala. Endgame heldur þó enn metinu fyrir stærstu opnunarhelgi á heimsvísu með 1,2 milljarða dala í miðasölu.

Miðasalan fór langt fram úr bjartsýnustu spám og hefur myndin margborgað sig miðað við kostnað. Meint þreyta áhorfenda með ofurhetjumyndir virðist ekkert bíta á Köngulóarmanninn sem virðist alltaf vinsæll hjá áhorfendum.

Tom Holland er sömuleiðis ótvíræður miðasölukóngur ársins í ár. Ekki nóg með að halda áfram að gera það gott sem Köngulóarmaðurinn heldur lék hann Telemakkus í The Odyssey sem stefnir hraðbyri á milljarð í miðasölu. Hann er þó ekki einn um að leika í báðum myndum, því Zendaya og Jon Bernthal gera það einnig.

Spider-Man: Brand New Day segir frá glímu Peters Parker við einmanaleika, vinamissi og nýjan dularfullan óvin. Leikstjóri myndarinnar er Daniel Destin Cretton sem hefur áður leikstýrt Marvel-myndinni Shang-Chi (2021) og þáttunum Wonder Man (2026). Leikhópurinn er stjörnum prýddur með Holland, Zendayu, Bernthal, Jacob Batalon, Marc Ruffalo, Sadie Sink og Florence Pugh í stórum hlutverkum.

Bíó og sjónvarp Hollywood Bandaríkin

Tengdar fréttir

Haaland hunsaði Holland

Hollywood-stjarnan Tom Holland játaði að það væri auðmýkjandi reynsla að fótboltastjarnan Erling Haaland skyldi hunsa skilaboð hans. Holland sá Haaland á formúlunni í júní og bauð Norðmanninum út að borða en fékk ekkert svar. Haaland viðurkenndi að hafa hunsað skilaboðin því hann vissi ekkert hver Holland væri.

Stórbrotinn stíll Zendayu

Það er of vægt til orða tekið að segja að leikkonan Zendaya beri af í klæðaburði. Engin önnur stjarna kemst með tærnar þar sem hún hefur hælana og undanfarið hefur henni tekist að toppa sjálfa sig algjörlega.

Óvænt nöfn á könnu Köngulóarmannsins

Fjórða myndin um Köngulóarmanninn með Tom Holland í aðalhlutverki er farin í framleiðslu og er leikhópurinn stjörnum prýddur. Svo virðist sem Hulk, Punisher og Scorpion muni allir koma við sögu.



Mest lesið


Fleiri fréttir

Sjá meira


×

Mest lesið


Tarot dagsins

Dragðu spil og sjáðu hvaða spádóm það geymir.