Sankað að sér milljónum fylgj­enda á tíu ára ferli

Ása hóf ferðaljósmynda- og áhrifavaldaferil sinn á miðjum þrítugsaldri og hefur ferðast víða um heim með myndavélina að vopni. Stjarna hennar á hinum ýmsu samfélagsmiðlum hefur vaxið hratt síðan þá.

Hvernig kom þetta til í byrjun?

„Þetta sprettur út frá rosamiklum áhuga á útivist og náttúru en líka ljósmyndun. Þannig þetta byrjar allt út frá ljósmyndun og ferðalögum. Ég er búin að vera að gera þetta í bráðum tíu ár og byrjaði í rauninni með blogg, ferðablogg sem þróaðist út á samfélagsmiðlana,“ segir Ása.

„Ég var alltaf að reyna að fara frá Íslandi og ljósmynda frekar erlendis,“ segir Ása. 

„En það var ekki fyrr en ég fór að ljósmynda Ísland sem það fór að vekja mikinn áhuga hjá fólki. Á þessum tíma hafði fólk ekki séð ljósmynd af svartri strönd, jöklum eða norðurljósunum,“ bætir hún við.

Orðið að persónulegu vörumerki

Síðustu ár hefur síða Ásu þróast meira út í persónulegt vörumerki.

„Samfélagsmiðlarnir eru ekki lengur svona miðlar til þess að deila bara ljósmyndum. Þú þarft líka að vera svolítið persónulegur til þess að fólk tengi við þig og nenni að fylgjast með efninu þínu,“ segir hún.

Sterkasti fylgjendahópur Ásu er á Instagram þar sem hún er með 1,5 milljón fylgjenda en hún er líka virk víðar. Á Facebook er hún með hálfa milljón fylgjenda, á TikTok eru þeir yfir sjöhundruð þúsund og á Youtube rúmlega 130 þúsund.

„Á heildina litið eru þetta yfir tvær milljónir að fylgja okkur,“ segir Ása.

Hvað þýðir það fyrir áhrifavald að vera með svona gífurlega marga fylgjendur?

„Eins og ég lít á þetta þá opnar þetta rosalega mikið af tækifærum sem mig hefði aldrei getað dreymt um, fá að vinna með alþjóðlegum fyrirtækjum og mikið af ótrúlega flottum íslenskum fyrirtækjum,“ segir Ása.

„Við vinnum þvert á ferðaþjónustuna og erum náttúrulega alltaf á ferðalagi um landið.“

Hjónin vinna náið saman

Þessi mikla ævintýrakona fór út fyrir landsteinana til að finna sér mannsefni en hinn sænski Leo er ekki bara eiginmaður heldur náinn samstarfsmaður Ásu í öllum þeirra verkefnum.

Nú vinnið þið hjónin mjög náið saman. Hvernig er að vinna með manninum sínum?

„Mér finnst það frábært,“ segir Ása, hlær og horfir á eiginmanninn sem er ekki í mynd.

Hvernig finnst þér að vinna með konunni þinni?

„Mér finnst það frábært,“ svarar eiginmaðurinn, Leo Sebastian Alved, á sama máta.

Hjónin hafa upplifað margt skemmtilegt í störfum sínum en eitt af því sem stendur upp úr hjá Ásu var þegar þau hjónin fengu að vera ein í tómu Bláa lóninu í heimsfaraldrinum. Leo nefnir hins vegar þegar hjónin fluttu til Flateyrar í heilan mánuð og skíðuðu þar í frábærri færð og góðu veðri.

Horfa má á viðtalið í heild sinni hér að ofan þar sem Ása ræddi meðal annars um lopapeysusölu hjónanna, heimili þeirra í Garðabæ og bestu áfangastaðin á Íslandi.