Gunn­laugur Árni hefur leik á U.S. Amateur

U.S. Amateur er stærsta áhugamannamót í Bandaríkjunum og mun Gunnlaugur Árni Sveinsson taka þátt í mótinu í ár. Risanöfn á borð við Viktor Hovland og Bryson DeChambeau hafa unnið mótið á sínum tíma.

Mótið er leikið með skemmtilegu fyrirkomulagi þar sem fyrstu tveir hringirnir eru spilaðir í höggleik á tveimur mismunandi völlum. Eftir þá hringi munu efstu 64 kylfingar mótsins halda áfram í holukeppni þar sem útsláttur verður leikinn.

Kylfingar leika einn hring á Merion Golf Club og annan á Philadelphia Country Club áður en ákveðið verður hverjir halda áfram í holukeppnina. Yfir 300 kylfingar eru skráðir til leiks og því verður hörð barátta um að komast í lokahluta mótsins.

Á síðasta ári komst Gunnlaugur Árni í holukeppnina en hann tapaði þar í 64-manna úrslitum gegn Max Herendeen. Mótherji Gunnlaugs Árna í fyrra rétt tapaði í 16-manna úrslitum.