Hreiðar vill hægja á og selja Stracta-hótel

„Þetta er stór ákvörðun fyrir mig þar sem hótelin hafa átt hug minn allan í rúman áratug,“ segir Hreiðar Hermannsson, stofnandi og eigandi Stracta, í tilkynningu.

„Nú langar mig hins vegar að hægja aðeins á, verja meiri tíma með fjölskyldunni og sinna öðrum hugðarefnum. Þess vegna tel ég rétt að nýir eigendur taki við keflinu.“

Í tilkynningunni segir að hótelin hafi gegnt lykilhlutverki í uppbyggingu ferðaþjónustu á Hellu. Þau hafi skapað um fimmtíu heilsársstörf og stutt við fjölbreyttari þjónustu og atvinnulíf á svæðinu, auk þess að hafa stutt við aukna þjónustu og uppbyggingu.

„Hella hefur tekið miklum breytingum á þeim tíma sem við höfum starfað hér. Bærinn er einstaklega vel staðsettur og hefur fest sig í sessi sem mikilvæg bækistöð fyrir ferðamenn á Suðurlandi,“ segir Hreiðar.

Hann telur einnig að fyrirhugaðar samgöngubætur á Suðurlandi muni styrkja stöðu Hellu enn frekar. Staðsetning bæjarins veiti þegar greiðan aðgang að fjölmörgum af þekktustu náttúruperlum og ferðamannastöðum Suðurlands.

„Bætt vegakerfi á Suðurlandi, meðal annars með nýrri Ölfusárbrú og nýrri tengingu milli Þjórsárdalsvegar og Landvegar yfir Þjórsá við Búðafoss, mun styrkja stöðu Hellu sem miðlægs áningar- og dvalarstaðar fyrir ferðamenn á Suðurlandi,“ segir Hreiðar.

Saman eru hótelin með 236 herbergi, þar af 185 á Stracta Hóteli og 51 á Stracta Hótel Mosfell.

Til stendur að stækka Stracta Hótel um 224 herbergi með fjórum nýjum byggingum á tveimur hæðum. Jafnframt hefur verið ákveðið að bæta um 1.300 fermetra nýrri hæð ofan á núverandi aðalbyggingu hótelsins þar sem áhersla verður lögð á funda- og ráðstefnuaðstöðu.

Sjá einnig: Hóteláform Hreiðars strand vegna veg­leysu

Hreiðar hefur ákveðið að láta hluta ágóðans af sölunni renna til góðra málefna.

„Mér hefur vegnað vel og ég er þakklátur fyrir þann árangur sem við höfum náð. Mér finnst því mikilvægt að láta gott af mér leiða og hef ákveðið að hluti ágóðans af sölunni renni til góðra málefna,“ segir Hreiðar.

KPMG hefur umsjón með söluferlinu. Reksturinn heldur áfram með óbreyttum hætti á meðan söluferlið stendur yfir. Salan hefur því ekki áhrif á bókanir eða þjónustu við gesti.