Manuel Pellegrini ákvað að hvíla lykilmenn sína í bikarleiknum gegn Chelsea um helgina og það borgaði sig því City spilaði frábærlega í fyrri hálfleik og var 2-0 forysta liðsins síst of stór.
Sergio Agüero skoraði fyrsta mark City en David Silva bætti öðru við eftir glæsilega sókn. Agüero fékk tvö góð skotfæri þar að auki í fyrri hálfleik.
Heimamenn komu þó af meiri krafti inn í síðari hálfleikinn og uppskáru mark þegar Vitaliy Buyalskiy skoraði mark með skoti sem breytti um stefnu á varnarmanni City.
Yaya Toure skoraði þó í uppbótartíma leiksins og bætti þar með fyrir mistök skömmu áður er hann skallaði framhjá af stuttu færi.
