Líkami og sál

Fyrir stuttu horfði ég dáleiddur á matreiðslumann sem vann á ótrúlegum hraða við að framreiða morgunmat handa viðskiptavinum sínum í New York. Maðurinn hafði ótrúlegt vald á því sem hann var að gera. Hann hafði tamið sér gott verklag og það skilaði sér í hraðri og öruggri þjónustu. Hann vann hratt en leit alls ekki út fyrir að vera stressaður. Þvert á móti virtist hann hafa mjög gaman af vinnunni og gantaðist stöðugt við samstarfsmenn sína og viðskiptavinina. Ég hugsaði með mér að þarna væri alls ekki um meðfæddan eiginleika að ræða. Með góðu verklagi og réttu viðhorfi getur öll vinna orðið létt og skemmtileg. Það er allt of sjaldgæft að sjá fólk sem sýnir metnað í vinnu sinni. Þegar að ég sat þarna við borðið og beið eftir morgunmatnum mínum var ég ánægður vegna þess að mér finnst ég aldrei vinna. Ég hef svo gaman að því sem ég er að gera. Ég áttaði mig líka á því að allt er erfitt þangað til að það verður auðvelt og ef ég byrja á því að temja mér gott verklag þarf ég aldrei að upplifa leiðinlegan dag á ævinni, jafnvel þótt þeir eigi margir eftir að vera erfiðir.