Sjávarréttir við smábátahöfnina

<>Kaffi Duus í Keflavík er einn þeirra snotru veitingastaða á landinu sem njóta þess að vera við sjávarsíðuna, sem verður að teljast mjög vel við hæfi í útgerðarbæ. Smábátahöfnin blasir við með því athafnalífi sem þar er og Bergið myndar bakgrunninn. Vinsældirnar leyna sér heldur ekki, að minnsta kosti var þétt setið þar daginn sem Fréttablaðsfólk var á ferð. Ferðamenn kunna greinilega vel við sig á þessum stað. Sjávarréttir setja svip á annars fjölbreyttan matseðilinn; skötuselur, humar, steinbítur og margar fleiri gómsætar tegundir. Súpa í brauðhleifi er eitt af því sem hægt er að ganga að vísu og kjúklingasalatið nýtur sérlegra vinsælda, að sögn starfsfólks. Kaffi Duus stendur á söguríku svæði þar sem allt er kennt við kaupmanninn Duus. Nú hefur pakkhúsum hans verið breytt í sýningarsali og söfn en veitingastaðurinn er nýrri af nálinni og var opnaður fyrir sex árum. Hann hefur verið stækkaður einu sinni og auk þess byggð stór verönd sem snýr út að bryggjunni. Útsýnið er í algerum sérflokki, bæði að degi til og ekki síður að kvöldi þar sem Keflvíkingar hafa verið svo framtakssamir að lýsa upp Bergið með ljóskösturum.