Grunur um íkveikju á Blönduósi

Talið er víst að rekja megi eldsvoðann á Blönduósi í fyrrakvöld til íkveikju. Þá brann fjögur þúsund fermetra iðnaðarhús við Efstubraut til grunna. Í fréttatilkynningu lögreglunnar á Blönduósi segir að rannsókn tæknideildar lögreglunnar í Reykjavík á vettvangi eldsvoðans hafi leitt í ljós rökstuddan grun um um íkveikju. Lögreglan biður alla þá sem búa yfir vitneskju um mannaferðir við Efstubraut í fyrrinótt um að hafa samband við lögregluna á Blönduósi í síma 455 2666. Í tilkynningu lögreglunnar segir að enginn liggi enn sem komið er undir grun.