Útivistaráfangi í FNV

Íþróttir úti nefnist einn áfangi í Framhaldsskóla Norðurlands vestra og er þetta fyrsta önnin sem hann er við lýði. Ein eining fæst út úr því að ljúka honum. "Þetta er trimmáfangi," segir Árni Stefánsson, íþróttkennari skólans. "Leikfimi og kappleikir innanhúss höfða ekki til allra en þarna opnast þeim nýir möguleikar til hollrar hreyfingar." Undir þetta tekur Jón Hjartarson, skólameistari. Segir að ýmsir sem hvorki aðhyllist hefðbundnar íþróttir né hestamennskuáfanga taki fagnandi þátt í trimminu og upplifi þar ýmsa sigra. Þeir fimmtán nemendur sem eru í útivistaráfanga skólans hafa nefnilega þegar gengið á tvö skagfirsk fjöll undir merkjum skólans og fræðst um náttúru þeirra og kennileiti, gil og gjótur. "Fyrst var fjallið Molduxi klifið, það er beint upp af bænum, rúmlega 700 m hátt. Það átti vel við að byrja á því þar sem skólablaðið heitir Molduxi," segir Árni og heldur áfram ferðalýsingum. "Næst var gengið á Tindastól í frá Skíðastöðum í Laxárdal og komið niður hjá bænum Reykjum á Reykjaströnd, þar sem Grettir tók land forðum. Þriðja ferðin er fyrirhuguð í þessum mánuði, þá verður gist í skála á Þúfnavöllum eina nótt." En hvernig skyldi verða prófað í þessum áfanga? "Það eru ekki próf en það er skyldumæting," segir skólameistarinn ákveðinn.