Tældi 9 ára telpu upp í bíl sinn

Lögreglan telur sig hafa greinargóða lýsingu á ungum karlmanni sem í gær lokkaði 9 ára telpu upp í bifreið sína í Kópavogi og ók með hana upp að Skálafelli. Hann laug að telpunni að móðir hennar hefði slasast alvarlega í umferðarslysi. Maðurinn tældi stúlkuna upp í bíl sinn við hringtorgið á mótum Álfhólsvegar og Bröttubrekku klukkan u.þ.b. 15.45 í gær. Hann kynnti sig sem lögreglumann og tjáði henni að móðir hennar væri illa haldin á sjúkrahúsi eftir slys og þangað ætti hann að fara með stúlkuna. Hann ók svo með hana upp á Mosfellsheiði í átt að Skálafelli þar sem hann skildi hana eftir. Um tveimur klukkustundum síðar, eða um klukkan hálfsex, ók maður á jeppa fram á telpuna við afleggjarann að skíðasvæðinu í Skálafelli. Hún var þá orðin blaut og köld. Eftir að stúlkunni var komið til byggða var hún færð til skoðunar á sjúkrahúsi. Friðrik Björgvinsson yfirlögregluþjónn segir að ekki sé grunur um að maðurinn hafi unnið henni líkamlegt mein, hver svo sem ásetningur hans hafi upphaflega verið. Hann segir að stúlkan beri sig vel miðað við þá lífsreynslu sem hún varð fyrir og að hún hafi getað gefið nokkuð greinargóða lýsingu á manninum. Hann er um tvítugt, sköllóttur eða svo til, með svört gleraugu og skekkhýjung fyrir neðan neðri vör. Það litla sem vitað er um bifreiðina er að hún er rauð með skotti, þ.e. ekki „station“. Friðrik segir að allt tiltækt lið lögreglumanna í Kópavogi vinni að rannsókn málsins. Nokkrar ábendingar hafi borist frá fólki í dag en ekkert sem leitt hafi til þess að maðurinn fyndist. Lögregla biður alla þá sem urðu varir við rauða fólksbifreið á mótum Álfhólsvegar og Bröttubrekku á bilinu 15.30-16.00 í gær, eða kynnu að hafa aðrar upplýsingar um málið, að hafa samband við lögregluna í Kópavogi í síma 560-3041.