Hollywood-kúrinn tekinn úr umferð
Innflytjendum Hollywood-kúrsins hefur verið synjað um leyfi til að markaðssetja hann af Umhverfisstofnun. Innflytjandinn hefur samkvæmt Heilbrigðiseftirliti Hafnarfjarðar og Kópavogssvæðis fjarlægt drykkinn af sölustöðum. Steinar B. Aðalbjörnsson, fagssviðsstjóri hjá Umhverfisstofnun, segir heimildina ekki hafa fengist þar sem of mikið af A-vítamíni séu í kúrnum. Mikil neysla á A-vítamíni geti valdið ógleði, höfuðverk og lifrarskemmdum. Hjá þunguðum konum geti of mikið A-vítamín valdið fósturskaða. Steinar segir Lýðheilsustöð hafa reiknað að dagleg neysla þeirra sem neyti kúrsins geti orðið allt að 5.000 míkrógrömmum sem sé 2.000 míkrógrömmum yfir hættumörkum. Hollywood-kúrinn var á 43 drykkja lista sem forsvarsmenn Ölgerðinnar Egils Skallagrímssonar bentu á að væru í verslunum án leyfis. Við stöðvun á dreifingu vítamínbætts Kristal plúss vildu þeir sýna það ójafnræði sem þeir segja að gæti milli íslenskra og erlendra neysluvara.
