Brasilíumannsins enn leitað

Fjölmenn leit hófst í morgun að Brasilíumanninum Ricardo Correia Dantas sem ekkert hefur spurst af síðan klukkan tíu á laugardagsmorgun að hann fór í gönguferð frá heimili á Stokkseyri þar sem hann var gestkomandi. Um það bil sjötíu björgunarsveitarmenn leituðu hans fram á kvöld í gær og í dag er von á fjölmennu liði af höfuðborgarsvæðinu auk björgunarmanna úr Árnessýslu. Ýmsar vísbendingar hafa borist um ferðir mannsins en engin þeirra hefur skilað árangri. Sérstök áhersla verður nú lögð á leit í fjörunni.