Afsöguð haglabyssa í skottinu

Ein kona og tveir karlmenn voru handtekin eftir að afsöguð haglabyssa fannst falin í bílskotti fyrir hádegi í gær. Eins fannst lítilræði af kannabisefnum við húsleit á Eyrarbakka heima hjá öðrum manninum. Fólkið var á leið vestur Eyrarbakkaveg á tveimur bílum þegar lögreglan hafði afskipti af þeim. Haglabyssan fannst í öðrum bílnum en nú liggur ljóst fyrir að byssunni var stolið í innbroti á síðasta ári. Fólkið, sem er á milli þrítugs og fertugs, hefur allt komið áður við sögu lögreglu. Þeim var sleppt að loknum yfirheyrslum í gærkvöldi en málið er enn í rannsókn.