Braust inn um glugga

Brotist var inn í blokkaríbúð á Kleppsvegi aðfaranótt fimmtudags og þaðan stolið farsíma, skartgripum og lítilræði af peningum. Þjófurinn braust inn um glugga en hvarf á brott þegar húsráðendur urðu hans varir. Að sögn lögreglunnar í Reykjavík sást til dökklædds manns á hlaupum frá húsinu. Tilkynnt var um innbrotið um klukkan fjögur um nóttina. Þjófurinn er enn ófundinn en lögregla segir ekki ólíklegt að haft verði uppi á honum og þýfinu, jafnvel þótt síðar verði. Þess eru dæmi að mörg mál leysist í einu þegar jafnvel finnst þýfi úr mörgum innbrotum hjá þekktum þýfissölum.