Vanbúnum jöklaförum er voðinn vís

Hjörleifur er einn af eigendum fyrirtækisins Íslenskir fjallaleiðsögumenn og hefur fylgt fólki upp á Hvannadalshnúk síðustu 10 árin, nú síðast um hvítasunnuhelgina. Hann hefur áhyggjur af göngufólki sem leggur vanbúið upp á jökulinn á eigin spýtur og hyggst nýta sér slóð atvinnuleiðsögumanna, án þess að vera með þeim í hópi. Þannig fólk verður hann oft var við, til dæmis um síðustu helgi.

"Þarna voru að minnsta kosti þrír einstaklingar utan við leiðsögn. Tveir voru saman en höfðu ekki línu á milli sín og sá þriðji var aleinn og hafði hvorki brodda né annan nauðsynlegan útbúnað," segir hann og telur þessa menn einungis heppna að hafa sloppið við hremmingar. Hann segir alltaf varasamar sprungur á leiðinni upp á Hvannadalshnúk, jafnvel yfir hundrað metra djúpar. "Seinni part dagsins geta snjóbrýr yfir slíkar sprungur hafa veikst mikið frá því um morguninn þegar heitt er í veðri. Ef menn eru ekki með línur eru menn í stórhættu en halda að allt sé í lagi," lýsir hann.

Hjörleifur óttast að hann og aðrir leiðsögumenn á hnjúkinn geti fyrr eða síðar lent í meiriháttar björgunaraðgerðum. "Þetta svæði verður æ vinsælla og er orðið þekkt sem aflraun. Þá er fullt af fólki á fjallinu sem er í ágætis formi en hefur engan áhuga á fjallamennsku og enga kunnáttu á því sviði heldur vill skella sér upp af því það er svo sérstök upplifun"

Hjörleifur tekur skýrt fram að þeir sem voru í skipulögðum ferðum á hnjúkinn um hvítasunnuhelgina á vegum Íslenskra fjallaleiðsögumanna, Ferðafélags Íslands, Útivistar og Einars Sigurðssonar á Hofsnesi voru að sjálfsögðu með útbúnað og öryggisatriði í lagi.