Bíður dóms fyrir sælgætissmygl

Sýslumaðurinn á Seyðisfirði hefur stefnt Árna Emanúelssyni til greiðslu sjö þúsund og fimm hundruð króna sektar vegna brota á tollalögum þegar hann hafði með sér um 25 kíló af sælgæti og gosdrykkjum við komu Norrænu til Seyðisfjarðar síðla árs 2004. Telst slíkt brot á tollalögum og var Árna boðið að ljúka málinu með sátt hjá Tollstjóranum á Seyðisfirði sem hann hafnaði. Árni hefur óskað eftir því að greiða toll af vörunum sem hann flutti inn en hafnar því að greiða sekt. Málflutningur í málinu hófst fyrir héraðsdómi Austurlands á Egilsstöðum í gær "Þeir leituðu í bílnum í fjóra klukkutíma og það sem þeir höfðu upp úr því var sælgæti sem ég hafði keypt og ætlaði að gæða mér á við akstur frá Egilsstöðum til Bolungarvíkur. Ég ætla ekki að una þessari niðurstöðu og fer með málið eins langt og þarf," segir Árni. Samkvæmt upplýsingum frá Tollstjóranum í Reykjavík er tollfrjáls innflutningur á matvöru takmarkaður við þrettán þúsund krónur og þrjú kíló. Allt umfram þrjú kíló telst tollskyldur varningur og ber ferðamönnum þar með að greiða gjald af vörunum samkvæmt ákvæðum tollalaga.