Málinu vísað frá

Máli sem Auður Sveinsdóttir Laxness höfðaði gegn Hannesi Hólmsteini Gissurarsyni, prófessor, var í gær vísað frá í Héraðsdómi Reykjavíkur. Auði var að auki gert að greiða Hannesi fimmhundruð þúsund krónur í málskostnað. Í niðurstöðu héraðsdóms kemur fram að ekki hafi verið nægjanlega gert grein fyrir brotum Hannesar í málshöfðuninni og sé hún því ófullnægjandi. Þar er Hannes sakaður um að hafa ekki notað tilvísanir með réttum hætti í bókum sínum um Halldór Kiljan Laxness og að auki nota verk Halldórs sjálfs of frjálslega. Hannes sagði þessa niðurstöðu ekki koma sér á óvart. "Það var aldrei sýnt fram á neina sök í þessu máli. Málið snýst nefnilega um það að aldrei var gerð tilraun til þess í stefnunni að sýna fram á lögbrotið, sem að sjálfsögðu var grundvallaratriði". Hannes hefur nú boðist til þess að gefa bókina út aftur með lagfæringum, og segir það vera sáttatillögu sína í þessu máli. Aðspurður að því hvort hann sé ekki að viðurkenna sekt sína með því, segir Hannes svo ekki vera. "Aðallega snérust athugasemdir fjölskyldu Laxness um það að tilvísarnir í Halldór Laxness hefðu átt að vera fleiri og endursagnir verka hans styttri. Ég er alveg tilbúinn til þess að taka tillit til þess og hef nú þegar unnið bókina með það að leiðarljósi, að mestu leyti. Það verða fleiri að fá að skrifa um Halldór Laxness en vinstri sinnaðir bókmenntafræðingar". Halldór Backman, lögmaður Auðar, undrast þessa niðurstöðu. "Það eru mikil vonbrigði að þetta hafi verið niðurstaðan. Undarlegast af öllu er þó sú krafa að stefnan þurfi að vera öll skrifuð upp, sem er á skjön við það sem hefur tíðkast hérlendis. Við munum að öllum líkindum kæra þetta til hæstaréttar og ef þessi niðurstaða er staðfest þar, þá verður málið sett á stað aftur. Það gefur auga leið." Halldóri finnst sáttatillaga Hannesar vera viðurkenning á sekt hans í málinu. "Í þessu hlýtur að felast ákveðin viðurkenning á sekt því af hverju ætti maðurinn að gera þetta, ef hann væri ekki tilbúinn til þess að fallast á að hann hafi gert eitthvað rangt?."